我哋呢班打工仔，好多時打份工都係為生活，希望有日可以儲夠錢去追求理想……但份糧只夠自己使，永遠儲唔到錢，無論想買樓定想發圍做生意都冇本，未來似乎無展望？一份好嘅Freelance工作，可以幫你有「第二收入」，助你有望早日儲到錢，擺脫「返工等放工，放工就搵工」嘅循環！就等小編列舉香港10大熱門Freelance工作嘅價位同優缺點，唔知你又啱做幾邊份？

　　1. 網上教外語

（圖源：AFP）

　　而家好多人會係網上嘅語言學校登記做老師，然後就用skype之類嘅溝通軟件教學，時間夠彈性。教授中文嘅薪金因經驗而定，一般係網上語言學校學習中文，一小時約US$20~$30，老師往往要畀介紹費用網站，但如果同學生關係Keep得好，不失為長遠嘅Freelance收入來源。

　　2.資料輸入

　　呢類工作通常就係睇住文件或透過聆聽，輸入資料到電腦，如果你自問打字夠快又夠準，資料輸入呢份Freelance就啱你喇。你可以選擇返Office輸入嘅類型，一般時薪約$60~$80；而如果你想時間更彈性，對自己打字能力又有信心，咁不如接一啲按件收費、在家工作嘅Freelance，例如係打字幕或逐字稿，輸入一段1小時影片嘅字幕，可以收取$1,000以上(當然你要識得用相關軟件啦)，而1小時錄音嘅逐字稿，亦可收取$500以上。

　　3.翻譯

（圖源：AFP）

　　翻譯工作係最常見嘅Freelance之一，最常見嘅一般中英文互譯，好多香港人都可以應付得到。英譯中嘅費用一般較平，以來稿計每字約$0.5~$1，而中譯英參考價錢就係每字$0.8~$1.5，如果係某啲專業範疇例如法律、學術，收費就可以更貴。

　　4.美術設計

　　美術設計又係巿面有大量Freelance嘅工種，但設計嘅酬勞算係比較「海鮮價」，如果工作較難拆件計，大家可以自己預計完稿所需時間，以作開價，例如每小時$300，預計要做3小時，就開價$900。而容易量化嘅工作如排版工作，可以收取每頁$120以上。

　　5.寫稿

　　文字唔值錢？而家係網絡世界，好多網站需要不斷有新嘅內容，以提高網站能見度，反而造就好多寫文章嘅Freelance。呢類寫手收費通常都係按篇計算，收費大約係每字$0.3~$1。當然，如果你係KOL或真正名家，寫稿嘅收入都可以唔錯，例如某啲專欄作家，係收取每字$10以上㗎。

　　6.影片製作

　　拍攝影片又係另一熱門Freelance，因為呢個行業已經算係Freelance性質主導！而家連未畢業嘅學生都接到大量工作，行業其實缺人，剪接一條片長1、2分鐘左右的影片，價位約$1,000~$2,000，如果是全套拍攝製作，價位則可以過萬。

　　　7.送外賣

（圖源：AFP）

　　如果你有電單車牌，同時又鍾意風馳電掣，送外賣可以係你Freelance工作嘅選擇。一般駕車送外賣嘅工作，時薪都會在$60以上，有部分公司甚至會有每單嘅津貼，例如每單加$5，多送收入就更高。

　　8.飲食樓面炒散

　　如果冇乜特別技能，做下飲食業嘅散工其實都都係一條Freelance出路。一般餐廳侍應時薪而家都會有$40以上；如果喺酒店工作，時薪可以有$70甚至破百。巿面雖然有好多App幫你搵樓面炒散類工作，但最好你都係搵到個好嘅「蛇頭」，咁工作量就比較穩定喇。呢種工作嘅另一好處，就係好多時可以現金出糧。

　　9.樂器導師

（圖源：AFP）

　　苦練樂器多年，教授樂器係好多人嘅Freelance途徑之一。做得樂器導師，每小時收入起碼都$100起跳，收入視乎學生級別而定。以鋼琴為例，學習8級鋼琴嘅學費每小時可達$500。但如果老師在琴行掛單，琴行一般會拆走50%學費；如果你想教樂器，最好就係快啲建立關係網，自立門戶喇。

　　10.馬會

　　因為不需要特別技能而薪金較高，糧準又穩定，馬會係好多人Freelance嘅選擇之一。喺馬會兼職主要分兩種，一種係電話投注助理，一種就係分行服務助理。電話投注如果係廣東話組，現在時薪有$55，分行服務助理就有時薪$59。

文章來源：hellotoby.com