文：Hin

藝人洪天明曾經喺無綫遊戲節目「獎門人」擔任過逾30次嘉賓，更贏得唔少獎金獎品，被網民戲稱做「獎金獵人」，更有人點算過洪天明咁多年喺節目上一共贏得超過20,000件花之戀壽司，成為洪天明其中一個「代表作」！

網民計算過洪天明喺「獎門人」贏得超過20,000件花之戀壽司（星島日報圖片）

最近有日本燒肉店攞洪天明做Gimmick大搞「洪天明優惠」，凡係顧客個姓名有「洪」、「天」、「明」其中一個字，就可以獲贈花之戀壽司，中一個字就送10件，如果中晒3個字嘅話就送1,000件花之戀壽司添！

有餐廳推出「洪天明優惠」，只要有「洪天明」其中一個字就送10件花之戀壽司（星島日報圖片）

果然優惠一出後惹嚟唔少網民關注，不過「主角」洪天明回應傳媒嗰陣，就話自己好多年冇食生三文魚，應該唔會去換嗰1,000件花之戀壽司，仲指自己只係有機會上最多次節目嘅藝人，唔可以稱得上係「獎金獵人」，而洪天明都坦言好掛住「獎門人」節目，有機會都想再次擔任嘉賓。

不過洪天明就話唔會去換（Instagram圖片）

責編：林偉德