文：Hin

唔少網民都鍾意喺討論區邊睇節目，邊同其他網民討論劇情，不過大家萬萬估唔到連明星本人都會喺討論區同大家一齊傾吓偈！

事緣高海寧（高Ling）主演嘅劇集《婚姻合伙人》正在熱播，喺網上好似連登討論區都有唔少人討論，而高Ling看到網民嘅意見，都想傾埋一份，特登申請帳戶，日前以真身喺討論區留言：「我終於申請到連登A/C啦，大家好！我係高ling！我睇左（咗）好多日comments，好想回覆大家！就由呢個post開始覆啦！呢場戲我自己親身倒吊架（㗎）！雖然有威牙，但坐係（喺）棵樹上面，向後訓（瞓）落黎（嚟）倒吊好得人驚同好辛苦架（㗎），睇我個樣就知！哈哈」

高Ling真身上連登討論區（Instagram圖片）

高Ling同時亦晒出兩張倒吊樹上一幕嘅花絮照，雖然起初大家都抱懷疑態度，但好快都確認係高Ling本人，紛紛留言向佢「表白」兼讚佢貼地，而高Ling亦相當親民，盡量回覆晒所有留言。

高Ling仲晒出兩張倒吊喺樹嘅花絮照添（網上圖片）

（網上圖片）

除咗高Ling現真身外，佢仲拉埋同劇嘅林秀怡一齊玩，林秀怡都開咗個帳戶同網民互動，仲話自己想用呢個討論區啲Emoji好耐添！佢哋兩個只係出現咗幾日，已經瞬間推爆咗幾個Post，仲獲得唔少正評，吸引更多人關注套劇，似乎呢種同網民直接對話嘅宣傳方式仲有效啲添，唔知之後會唔會有其他演員現身呢？

之後連林秀怡都開帳戶傾埋一份（Instagram圖片）

林秀怡現身，高海寧仲寫包單話係佢真人添（連登討論區截圖）

責編：林偉德