文：Hin

無綫處境劇《愛．回家之開心速遞》收視一直高企，深受觀眾喜愛，連帶一班綠葉配角都成功彈起，為咗同網民有更直接嘅交流，呢班綠葉演員好似「曹總」劉一飛、「譚道德」陳榮峻都先後開咗Instagram（IG），最近就輪到「伊莎貝拉．群」許思敏加入IG行列啦！

許思敏憑住「群姐」一角深受網民喜愛（影片截圖）

許思敏喺IG簡介自稱表面係威龍集團清潔工，實際係寵物小精靈之首——群伊貝，必殺武器係地拖掃把廁所棍，仲話佢「白滑嘅身軀、曼妙嘅胴體」等緊大家添！

輪到群姐開IG啦

雖然許思敏只係啱啱接觸IG，但已經跟隨唔少網紅嘅潮流玩「照騙」，大玩大眼V煞面，而佢更留言：「我伊莎貝拉群最反對P圖，今日同好姊妹墮妮娜上影樓影相，影得我好鬼靚，攝影師話佢只識影相，唔識P相，講真，我Isabella真係好上鏡既。」佢仲搞笑Hashtag「#bobby都話我似關詠荷 #垂涎我既（嘅）美色」

群姐啱啱接觸IG已經學人玩「照騙」（Instagram圖片）

之後許思敏又Post咗一張同偶像歐陽震華合作拍廣告嗰陣嘅合照，再留言指偶像讚佢似關詠荷：「我終於見到歐陽波比啦，bobby仲話我似關詠荷。」

佢仲晒出同偶像歐陽震華嘅合照（Instagram圖片）

許思敏開IG嘅消息引嚟唔少關注，卻有部分網民就抱懷疑嘅態度，不過睇返「大小姐」林淑敏、「龍力士」鄭世豪、「鐵面陳」王致狄都有Follow，林淑敏同鄭世豪仲分別留言「Welcome Isabella」、「伊莎貝拉群，得閒要過啲料比二房至得㗎」，呢個應該係真．群姐IG啦！

林淑敏同鄭世豪都有留言

責編：林偉德