文：Hin

藝人黃心穎同許志安早前爆出背另一半偷食後，安仔宣布暫停所有工作，心穎則敗走美國，有傳佢會修讀有關演藝同導演嘅短期課程，心穎嘅男友馬國明就繼續專心工作，至於安仔嘅老婆鄭秀文亦原諒老公，噚日仲喺社交網留言話「不回望，向前看，讓時間一步步帶領。」

安心事件應該告一段落（Instagram圖片）

事件看似已經完結，不過一直力撐心穎嘅落選港男梁裕恆（Flow）先後多次就「安心偷食」發表意見，仲拍片講到「安心」遭人設局陷害，最後唔知係咪畀人鬧得多，佢不但刪走影片，連之前講過安心嘅內容都刪走晒，正當大家以為Flow終於收口，點知今日（29號）佢又再「發功」，聲稱係「最後一次提及『安心事件』」，更踢爆一個話佢抽水嘅男藝人曾經夾女藝人上房不遂！

點知港男Flow一直狙擊呢件事，今日又再出Post話「最後一次提及『安心事件』」喎（Facebook圖片）

Flow喺長文中講到刪Post嘅原因係佢知道同要講嘅嘢都講完，對佢嚟講已告一段落，而佢一直嘅觀點只有心穎係有錯，但同時亦係受害人，另外四人關係唔係大家所知咁簡單，同埋娛樂圈或社會上不斷發生同樣事情，冇必要咁樣至人於死地。

同時Flow直指遭受網民嘅網絡欺凌，但佢唔會因為咁而唔開心：「有個人講得好岩（啱），係（喺）呢件事上唔踩多佢一腳就已經係敵人，講番句公道小小既（嘅）說話已經要被攻擊，其中一個原因是人是不願意接受自己一直相信既（嘅）事係假的、錯的。我出post後大量是假ac來言語攻擊，大約比例是7成假ac、2成fans、1成無聊人。很多朋友關心我有無事，對我不太了解，我會堅持做我認為對的事，即使千夫所指，而且怎會為一d（啲）完全唔識、無關痛癢既（嘅）人或說話去唔開心。」

Flow話唔會因為抨擊而唔開心（Facebook圖片）

另外，Flow指遭到一個男藝人寸佢抽水，佢反斥嗰個男藝人壞事做盡，仲爆料話：「曾經想夾一個女藝人上房，最後傾唔掂數，對人講左（咗）句『你以後無運行』，自己周身屎既（嘅）人，做咩要提及我d（啲）小人物，抽我水呢？人人都想抽水，但水並唔係咁抽。」最後Flow坦言自己拒絕傳媒嘅專訪，強調唔係想出位，仲話自己根本唔使靠呢行搵食。

Flow爆料話有男藝人想夾女藝人上房不遂（Facebook圖片）

責編：林偉德