文：Hin

歌手許志安日前被踢爆背妻偷食黃心穎，最後佢召開記者會公開道歉，並宣布暫停所有工作，就連原定9月舉行嘅演唱會都要取消！安仔嘅「賤男」形象惹嚟唔少批評嘅聲音，而有網民發現佢所屬嘅組合Big Four幾乎每個成員都捲入過醉駕、吸毒等醜聞，同韓國天團BIGBANG嘅情況似到十足，因而戲稱佢哋係「港版BIGBANG」！

許志安因為背妻偷食，形象跌到落谷底（影片截圖）

BIGBANG入面除咗太陽係「最後清泉」外，其他成員都曾經出過事，好似大聲喺2011年涉嫌醉駕撞死電單車司機而被起訴；T.O.P喺2017年就被爆喺2016年四度於女練習生韓瑞希嘅住所吸食大麻；隊長G-Dragon就喺上年入伍前被踢爆隱瞞碩士學歷，疑走兵役法律罅逃兵役，之後又被指當兵期間享有特權；勝利則喺早前因投資嘅夜店捲入性招待等醜聞而被警方調查，甚至宣布退出演藝圈！

BIGBANG除咗太陽（右二）外，其他成員都捲入過醜聞（Instagram圖片）

巧合地，Big Four嘅蘇永康、梁漢文同許志安都先後捲入醜聞，蘇永康喺2002年於台灣一酒吧涉嫌服食同藏有搖頭丸被扣查；梁漢文就喺去年涉嫌醉駕被捕；許志安則被爆背住鄭秀文偷食黃心穎。淨低嘅張衞健就同太陽一樣成為組合嘅清泉，二人同樣愛錫太太，張衞健仲陪伴張茜走出流產陰霾，係娛樂圈公認嘅「愛妻號」！兩個組合嘅情況咁相似，難怪網民都講笑指Big Four係「港版BIGBANG」啦！

Big Four情況同BIGBANG差唔多，得張衞健冇傳出醜聞（星島日報圖片）

責編：林偉德