文：Hin

藝人黃心穎噚日驚爆背住男友馬國明偷食人夫許志安，惹嚟全城鬧爆，心穎更被指遭無綫雪藏。今次事件馬國明同安仔老婆鄭秀文無疑係最大受害者，而蔡一智同杜德偉就被網民「惡搞」而受牽連，不過其實仲有一個藝人因為「安心偷食」而慘變受害者之一，所講嘅就係張振朗！

黃心穎因為偷食人夫許志安搞到形象大插水（Instagram圖片）

張振朗首次擔正做男一嘅劇集《堅離地愛堅離地》，原定緊接《鐵探》播放，但因為擔任第二女主角嘅心穎曝出偷食醜聞，搞到形象插水，令無綫決定抽起劇集。

有傳因為心穎醜聞關係，張振朗首次擔正嘅《堅離地愛堅離地》臨時被抽起（Instagram圖片／網上圖片）

受影響嘅唔止《堅離地愛堅離地》，另外一套由張振朗做男主角、心穎做女主角嘅《牛下女高音》同樣有可能因為心穎嘅醜聞而無法見天！

另外由張振朗、黃心穎做男女主角嘅《牛下女高音》都可能受影響（星島日報圖片）

其實張振朗早喺今年2月嗰陣，因為劇集拍完年半都未播而喺社交網發文「集氣」求播出，雖然最後「集氣」成功播映有期，點知臨門一腳因為心穎嘅關係搞到劇集被抽起，依家連帶另一套自己做主角嘅劇集都隨時冇得見街，連中兩元，佢都可以話係今次事件入面最無辜嘅受害者之一。

張振朗喺今年2月曾開到聲希望《堅離地愛堅離地》有機會播出（Instagram圖片）

【新增內容】

至於張振朗透露短訊回應傳媒時，表示：「首先好多謝大家對呢套劇嘅關心，其實現階段劇集播唔播都唔係最重要，一切都係順其自然，最緊要每一日努力做好自己眼前嘅工作。 無論作為同事定朋友，希望每一位都安好，繼續健健康康過日子。 至於關於外界對我嘅言論，我唔作太多回應喇，呢幾個月我日夜顧着《極度怪咖》嘅拍攝，心機時間都全置於拍劇裏面，感謝！ 」

責編：林偉德