文：Hin

「安仔」周嘉洛同「朱凌凌」吳偉豪憑住喺處境劇《愛．回家之開心速遞》入面嘅HEHE兄弟情，深受網民嘅喜愛，劇中佢哋一舉一動都引發到網民無限嘅幻想，不過原來二人唔止喺劇入面咁「Sweet」，就連戲外都甜到漏！

周嘉洛同吳偉豪噚晚亮相遊戲節目《娛樂大家》，其中一個環節「Cheat Chat」就係一眾嘉賓都有一個「禁語」或者禁做嘅行為，如果講咗或者做咗嘅話就要接受頭上插花嘅懲罰，而嘉賓之開可以互相陷害令其他嘉賓中伏。

周嘉洛同吳偉豪擔任《娛樂大家》嘉賓（影片截圖）

至於當時周嘉洛唔可以做嘅就係「講《愛回家》」，而遊戲一開始佢已經成為汪明荃（汪阿姐）同森美嘅目標，要佢講入行幾耐同拍咗咩劇，起初周嘉洛都淨係講自己入咗行3年，當森美再追問佢入行後拍咩劇，得知周嘉洛「禁語」嘅吳偉豪為咗保護周嘉洛，挺身而出話：「我哋入行就拍處境喜劇嘅。」佢仲代埋周嘉洛講套劇叫《愛回家》，令對方唔使受罰。

主持想迫周嘉洛講出《愛回家》呢個禁語（影片截圖）

吳偉豪見狀即護「花」（影片截圖）

雖然吳偉豪護「花」成功，但禁語係「講角色名」嘅佢介紹自己角色嗰陣講咗「Chu Ling Ling（朱凌凌）」，最後遭受插花懲罰。及後汪阿姐想再追問周嘉洛嗰陣，吳偉豪就同周嘉洛打晒眼色，好彩周嘉洛理解得到，更估到佢嘅「禁語」係講愛回家！

可惜吳偉豪救到周嘉洛卻犧牲咗自己（影片截圖）

呢個遊戲環節成功惹起一班「安凌CP」粉絲尖叫，話「朱凌凌」戲裏戲外都咁錫「安仔」，保護對方嘅舉動Sweet到漏，大讚佢係暖男，睇嚟大家睇《愛．回家》真係睇到好投入，就連戲外嘅互動都唔放過，唔知無綫會唔會食住個勢，畀多啲機會「安凌」放閃呢？

網民大讚佢哋戲裏戲外都咁Sweet（Instagram圖片）

責編：林偉德