文：Hin

打麻將驚現5隻「六筒」咁靈異？話說填詞人黃偉文（Wyman）近日約咗朋友出去有自動洗牌麻將枱嘅地方打牌，不過佢哋事前冇檢查清楚，竟然打咗六鋪牌後先驚覺出現咗5隻「六筒」！

黃偉文同朋友喺有自動洗牌麻將枱嘅地方打牌，點知就出事喇（Instagram圖片）

Wyman事後將呢個奇景影低擺上網，仲留言勸大家打牌前要睇清楚：「希望各位朋友以後出外使用『自動洗牌麻雀枱』前先檢查一下！ #打咗六鋪先發現 #點解咁遲呢 #詳情一匹布咁長 #唔想打六版紙咁多字 #至愛親朋第日見到我先問返我啦 #雀壇奇案錄」

麻將枱上竟然有5隻六筒！（Instagram圖片）

唔少網民睇完之後都問「邊個出千」，仲講笑表示：「槓完打返隻出來囉！」、「一直以為呢啲只係傳說，原來真係會發生…千王之王」另外有網民則提議Wyman可以藉此寫首新歌，更幫新歌諗埋歌名叫《第五隻六筒》，唔知Wyman又會唔會攞呢次經歷做寫歌靈感呢？

有網民叫Wyman攞呢次經歷寫返隻《第五隻六筒》，唔知Wyman會唔會考慮吓呢？（Instagram圖片）

責編：林偉德