文：方以文

上星期傳出ViuTV拍BL劇，以為係香港電視圈今個月最震撼嘅消息。點知噚日仲有另一個震撼彈，無綫喺下晝任命曾志偉同王祖藍做管理層，曾志偉做副總經理、王祖藍做首席創意官成為曾志偉副手，兩個人全面接掌綜藝資訊娛樂節目。

注入更多年輕元素？

外界嘅反應負面居多，認為年老嘅獎門人好難有創意，北上多年嘅Handelababy唔了解依家香港觀眾嘅要求。呢啲懷疑都好合理，不過年紀高低同創作力唔掛勾，北上又未必唔留意香港巿況。就當佢哋喺自己嘅領域繼續係fit嘅，固有觀眾又繼續留低，但佢哋嘅嘢啱唔啱新一代觀眾口味？做唔做到許濤話為「TVB的節目內容注入更多年輕的元素」嘅目標？

舊招重用一定唔work

曾志偉「獎門人」嘅稱號嚟自遊戲節目《超級無敵獎門人》系列。歷年嚟多次成為無綫救亡嘅皇牌。自從獎門人消失之後，咁多參加者嘅大型遊戲節目少之又少，就算有類似嘅「放暑假」系列都搞唔到咩迴響。睇埋99台，舊形式主持問嘉賓答嘅遊戲節目暫時都唔受歡迎。

王祖藍靠扮嘢演趣劇起家，當年福祿壽三個當中佢扮女人最落力，但去到後期觀眾厭倦。返到內地因為少人做類似嘅嘢，王祖藍搶到頭啖湯，事業再創高峰。踏入2020年代，網上嘅反應明確表態，如果將以往戰績複製再推出係唔work嘅。佢哋領導之下，喺呢兩個範疇可唔可以再進化？

暫時見到唯一可取嘅，係喺近年嚟余詠珊掌管之下，無綫綜藝資訊節目單一化嘅問題有望解決，唔使十個有九個都係煮食節目。不過以曾、王嘅往績嚟講，要製作一啲有深度、有質感嘅節目，就真係抱觀望態度喇。

香港味=本土味+國際味

睇返TVB主席許濤發畀員工嘅信，裡面提到希望兩位新任高層「協助擴大與香港影視業界的開放合作至推動內地、大灣區及國際華語市場的業務拓展」，無綫向內地同大灣區嘅方向不變。喺2018年，王祖藍以廣西政協委員兼藝人身份接受港台節目《星期三主場》訪問，當年佢已經話大陸綜藝節目好多都已經吸收咗香港嘅嘢再自行發展，香港製作人藝人北上唔再咁容易。被主持問到香港人點樣搵返香港人嘅身分時，王祖藍話「如果各方面做得好，我諗香港仲有好多發展空間。強調本土，但同時間要放眼國際，包括中國。」。王祖藍亦喺節目裡面提到「香港味」唔係單純只有「本土味」，而係兼有「國際味」。

希望王首席創意官可以將呢個答案嘅方向，嚟緊用喺節目製作之上。因為正如佢咁講，抽走香港味，將大陸嗰套搬嚟香港，無論喺香港巿場定大陸巿場，甚至喺全球廣東話影視巿場，都唔會行得通。

圖：視覺中國、星島日報、王祖藍@微博