伍健偉雖然成功呃like，但like數仍然少過何君堯。圖：星島

文：陳凱文

雖然咁講可能會得罪人，好多人亦唔願意承認，但係非建制派自修例風波以來，最大嘅失誤就係所謂嘅「唔割蓆」。一係非建制派之間除咗反共外，政治信仰上其實存在種種差異，例如有啲人主張和理非，有啲人主張勇武，有啲人比較溫和，有啲人比較激進，有啲人比較講求言行一致，有啲人比較不擇手段。

即使假定信仰上相同，你都唔能夠排除隊伍上有豬隊友，甚至係品格上有缺陷嘅人存在。只不過，當非建制派為求所謂嘅團結，主張乜鬼「核爆都唔割蓆」時，呢啲豬隊友，做事不擇手段，甚至係為求一己私利而亂來，非建制派原有嘅道德高地，就會逐漸喪失，並且慢慢將一啲中間或淺藍嘅群眾，逐漸推向對立面。

例如喺《香港國安法》推出之前，衝衝子喺街頭上除咗掟汽油彈之外，仲以「罷工」名義阻人返工，以「裝修」嘅名義大肆破壞藍店，同埋以「私了」嘅名義，襲擊政見唔同嘅藍絲，就完全係口頭上話要爭取民主自由，實際上做着損害他人身家性命財產嘅事。所謂藍店即使政見上同非建制派唔同，但佢哋無做過乜嘢直接損害你個人嘅事，你憑乜嘢燒人間舖？你有搞罷工嘅自由，對方又有唔響應你嘅自由，你又憑乜阻住人返工？

另一個核突非常嘅例子，就係早排有個叫伍健偉嘅元朗區議員，因為想喺Facebook呃like，於是就拎個議席出來要脅同路人，話一個禮拜內like 數如果仲係少過何君堯，佢就會辭職唔撈。結果一個禮拜過咗去，伍健偉雖然成功呃like，like數暴增到14萬9千，但係何君堯嘅like數亦加咗2萬9，結果伍健偉嘅like數仲係少過何君堯。

去到呢個地步，伍健偉既然學人輸賭，如果佢係一個講口齒嘅人，就應該言出必行，立即主動辭職，但係佢並無咁樣做，而係當無件事。你唔好話我聽，伍健偉個輸賭，只係話自己一個禮拜後嘅like數，唔少於何君堯一個禮拜前嘅13萬9千like，所以佢已經成功達標啊？如果非建制派都學人玩語言偽術的話，我會笑㗎！

更大嘅問題係，當其他非建制派見到伍健偉咁樣呃like法，仲要輸賭輸咗賴皮嘅時候，佢哋係咪應該割蓆呢？好明顯，伍健偉咁嘅所作所為，一定會被藍絲恥笑佢戀棧權位，唔捨得佢份區議員人工，而且點睇都係幫唔落。先撇開伍偉健嘅品格問題唔講，佢對成個非建制陣營來講，已經成為負資產。假如喺呢個時候，非建制派仲學人講乜嘢「唔割蓆」，唔革走呢啲害群之馬的話，第日佢哋話中央港府建制派冇口齒，咪係五十步笑百步囉？

作者為時事評論員

本文為作者觀點，不代表本媒體立場