文：港女友

朋友嘅另一半最近被踢爆出軌，當初我朋友聞到味時有直接問過另一半：「你係咪有第個？」另一半堅決否認。到後來愈嚟愈多證據，甚至第三者都出手搵我朋友，東窗事發，佢另一半仲深潛幾日，我朋友已經由失望變成絕望。後來佢另一半再出現番，想同我朋友道歉認錯，但係已經太遲，佢已經錯過哂可以道歉同認錯嘅最佳時機。

（資料圖片）

如果喺最初朋友未發現時認錯，呢種叫自首，主動投案應該得到減刑。到我朋友第一次問佢時，其實係一個好好嘅時機坦白，對方問得你，已經係做好心理準備，亦都希望你可以坦白。當你錯過埋呢個坦白時機，要去到被人踢爆，但都無即刻認錯，仲深潛，基本上你已經失去認錯嘅機會。當一個人去到絕路，退無可退先識得認錯，基本上可以反映出佢嘅悔改心好低，只有逼到佢不得不認錯，佢先肯面對，呢種人已經錯過太多機會，唔太值得原諒。

道歉都需要時機同誠意，傷害完人仲好似懦夫一樣逃跑，將受害人放喺度自己淌血，有幾多悔改誠意大家心知肚明。有人話浪子回頭金不換，如果絕路之前回頭係知錯能改，如果去到退無可退先被逼回頭，咁只係狗急跳牆，走投無路而已。

責編：EK