AI摘要

【橙訊】現年42歲的熊黛林（Lynn）自2016年與百億闊少郭可頌結婚後，成為豪門闊太，一直過住少奶奶般的幸福生活，仲育有一對孖女，家庭生活美滿。而向來形象高貴大方的Lynn，近日在社交平台大爆戀愛小秘密，首度公開當年係自己先「主動出擊」追老公，仲試過因為示好落空而「慘食檸檬」，笑言到而家諗返都覺得尷尬。

Lynn自爆當年倒追郭可頌。（圖：熊黛林@小紅書）

Lynn提到自己同郭可頌的緣份，始於一個飯局。當時佢對呢位「郭生」一見傾心，但對方卻木口木面，冇乜表示。Lynn笑住回憶：「嗰陣我仲要主動約佢飲嘢，點知佢竟然話唔得閒！」Lynn直言被拒絕會有少少失落，但佢冇就此放棄，期後再透過朋友聚會慢慢加深了解，最後先成功打開男方心房。

熊黛林並非出身豪門，自爆試過窮到「只有20元」，後來憑藉自身努力升級做名模。 （圖：熊黛林@小紅書）

雖然經歷過「倒追失利」一幕，但Lynn並冇覺得丟架，反而用玩笑口吻話：「原來女仔主動都唔一定輸，最緊要夠真心。」呢番說話即刻引來大批網民熱議，唔少人都大讚佢夠敢講，形象更顯親民。亦有人感嘆：「原來連熊黛林咁嘅大美人，都有食過檸檬嘅時候！」 依家兩人結婚近十年，感情依然甜蜜如初，Lynn分享婚姻心得時亦講到：「最珍貴嘅係互相體諒同陪伴。」睇嚟昔日「追夫」的小插曲，已經成為佢同郭可頌之間最浪漫又好笑的回憶。

婚後誕下一對雙胞胎女兒Kaylor和Lyvia。（圖：熊黛林@小紅書）    

圖：小紅書