文：湯文亮

在香港與美加買樓，在簽臨約時有多少不同，香港會在臨約寫明以正式合約為基準subject to contract ，在美加就會寫subject to finance ，如果銀行唔批，買家有權唔買。不過，現在香港買樓，可能要加埋subject to finance ，因為銀行隨時唔批，甚至唔批多過批，搞到要被業主殺訂以及賠佣金俾代理，咁就唔值得。

有人話香港經濟其實唔錯，有很多新股上市，IPO全球第一，股市亦上升，優質人口增加，資產管理又超越新加坡，估計在2030年超越瑞士，成為全球資產管理最多地區，有咁多利好因素，樓市點解唔升，其實，理由很簡單，就是香港銀行唔借錢俾人買樓，就算有無數利好因素，樓市都唔會升。

有人話銀行唔借錢俾人買樓，真係一百歲唔死都有新聞聽，銀行家話睇唔好樓市，所以唔借錢俾人買樓，其實，如果真係睇唔好樓市，更加要借錢俾人買樓。

一個人如果欠銀行1億元，抵押物業也是1億元，有人願意出1億元買入那個抵押物業，如果銀行睇唔好樓市更加要做按揭，因為新買家最多能夠借5,000萬，換句話說，同一個抵押品，銀行只是借出5,000萬，大幅降低一半，風險自然減低，所以，銀行話因為樓市有風險而唔借錢俾人買樓是講唔通，真正原因要問銀行家才知道。

本文為作者獨家供稿

本文為作者觀點，不代表本媒體立場。

圖：視覺中國