文：珍寶豬

有日一位女士帶住一個婆婆嚟到診所。

婆婆坐低後，女士行埋嚟登記處：「我阿媽睇，我印象中佢有喺度睇過，你幫我睇睇係咪呀？」佢放低婆婆嘅身份證。

我：「有呀，我同佢登記咗㗎啦，坐低等叫名就可以」

女士拎返身份證行埋去婆婆身邊坐低。

婆婆：「XX唔得閒咩？」

女士：「佢返工呀」

婆婆：「咁勤力咁乖仔呀，公司一定係好需要佢，佢好重要先請唔到假陪我睇醫生」

我都成日請唔到假㗎，我係咪都係好重要嘅人呀老闆？

女士點點頭：「嗯」

婆婆：「都係我個仔乖，我個仔叻有本事，又勤力又叻，可以返足咁多年工」

打工打得耐原來就係叻同有本事，一於打工打到100歲！

女士：「嗯」

婆婆：「XX幾時得閒呀？」

女士：「我唔知呀」

婆婆：「我打俾佢都唔聽電話」

女士：「嗯」

婆婆：「一定係返工忙，太多緊要嘢做」

總會有收工嘅時候掛？

婆婆：「你就成日都好得閒，打親俾你都好快聽到我電話」

呢啲係得閒嘅表現嗎？唔係重視次序嘅表現嗎？

女士都只係『嗯』一聲。

到睇完醫生，拎藥時，我：「二百蚊啊」

女士行返去同婆婆講：「媽，二百蚊呀」

婆婆：「你二百蚊都冇㗎咩，咁都問我拎，XX都冇問過我拎呀，你老公咁冇本事咩，個老婆銀包二百蚊都冇」

女士：「我唔係冇二百蚊，但係你睇醫生嘅錢...」

女士都未講完，婆婆就搶住講：「XX都冇要我自己俾過睇醫生錢呀」

女士：「你個仔幾時帶過你睇醫生呀？你個仔有邊一次係理你㗎？你個仔你個仔，你連佢都搵唔到呀，你個仔冇理過你呀」

婆婆喺袋度一邊拎錢一邊口噏噏：「冇錢淨係識發窮惡，XX自己有本事，大把錢」

女士：「你個仔最本事就係仔嚟嘅」

婆婆繼續口噏噏，女士拎二百蚊放低俾我，就轉身行返去扶住婆婆離開診所。

明月照溝渠，放手啦。

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：mdjaff@freepik