AI摘要

文：湯文亮

有老友最近以非常合理價錢買到一個優質物業，本來這個物業有其他買家傾緊，但由於傳媒不斷報道樓市負面新聞，那個買家遲遲唔肯落搭，並不是唔買，只是不斷鋤價，搞到業主非常心煩，於是搵其他物業代理幫手。

由於價錢已經大幅下跌，有興趣的人非常之多，當中有一個已經交了臨時訂金，在簽正式買賣合約前，買家的律師修改合約條款，令到合約對賣家不利，就算簽約都不能縛住買家，既然如此，賣家唯有搵其他買家，最後我老友冷手執個熱煎堆，曾經有機會買入的買家都呻笨，仲話早知唔鋤價或者改動合約條款，老實說，這個世界有早知冇乞兒。

當一個物業在市場放售，其實唔止一個買家，當樓價下跌，買家就會愈來愈多，最後業主甚至要叫哂所有有興趣買家競投。不過很奇怪，多人爭又會令樓價扯了上去，甚至高過業主期望，所以，買家如果對某一個物業有興趣，鋤價時間千祈唔好太耐，否則有機會被其他人捷足先登，自己就為他人作嫁衣裳。

簽了臨約，買家一定會要求律師幫手，修正業主律師制定的買賣合約，很多買家律師為了表現自己的專業，作出很多對買家有利條款，最後正式合約可能簽唔成，有經驗買家可能會要求以臨約進行交易，到最後乜事都冇，買賣雙方可以如期交易。由此可見，買家律師所制定的條款是非必要，不過，大多數買家唔敢要求以臨約交易，否則如果出事，就會被自己律師笑到面黃。

本文為作者獨家供稿

本文為作者觀點，不代表本媒體立場。

圖：中通社