文：珍寶豬

有日一位女士睇完醫生拎完藥。

我：「呢度二百四十」

佢：「頭先你唔係收二百四㗎？收貴啲我嘅點解？」

我：「我哋係兩日藥收二百四十呀，塊牌都有寫明（指收費牌俾佢睇）。

佢：「頭先你同另一個人講唔係二百四呀，佢二百咋」

我恍然大悟：「哦～嗰個長者嚟，有長者優惠呀」

佢望住我拎二百蚊擺低。

我：「你未到有長者優惠嘅年齡啊，仲爭四十蚊...」

佢：「唔係好公平囉我覺得」

呢個世界就係唔公平㗎啦，你做咗幾十年人仲咁天真信世界有公平？

我：「到你65歲後都一樣有長者優惠嘅」

佢：「我有冇咁長命都唔知啦，而家用定先都唔過份啫」

人哋先駛未來錢，你就先駛未來命嘅概念嗎？我用你條命呀！

我：「唔好意思，冇得咁用」

佢：「咁樣真係好唔公平，佢老過我就平咁多，佢搵嘅錢都多過我啦，上晒岸啲老嘢先係最應該俾多啲」

唔好再執著呢啲嘢啦，過你自己嘅生活啦，你自轉諗人哋嘅嘢都冇用。

我：「你仲要唔要啲藥呀...如果你唔俾多四十蚊，我冇辦法俾袋藥你...」

佢：「呢四十蚊你唔應該問我拎，你應該問頭先個老嘢拎」

我：「我哋醫生有提供長者優惠...而你嘅診金連兩日藥我哋係寫到明二百四十」

佢：「我點知你係收我二百四呀，我唔知㗎嘛，其他都肯收平我㗎啦，係你唔肯」

咁你做咩要過嚟我哋診所睇咁犯賤？人哋人哋人哋明明對你咁好。

我：「其他地方點處理唔代表我哋一樣，我哋係寫明二百四十」

佢企喺度唔出聲。

我：「小姐你仲需唔需要啲藥？」

佢：「叫你阿頭出嚟啦一係，我唔同啲細粒冇話事權嘅人講啦，幫唔到成件事嘅都」

你似係幫緊件事嗎？點睇你都似係搞緊事呀。

我：「我個阿頭就係醫生，長者優惠都係醫生話要65歲先有嘅，就算你問佢都係一樣答案，你都係要等到65歲先可以有呢個優惠」

佢：「你唔問點知呀？你唔俾佢對我特別啲咩？」

特別啲？你有咩咁特別呀？你係咪自視過高呀？

我笑一笑，行入去呆企一陣。

再出返去同佢講：「要65歲先可以有長者優惠」

佢好嬲樣：「咁我當俾乞兒囉！」

終於成功收到二百四十啦！

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：mdjaff@freepik