文：湯文亮

有老友問我，樓價下跌咁多，我有沒有被人鬧，被人鬧就沒有，不過被人笑損失慘重，賺錢的唔講，只講我蝕到「PK」，老實說，如果沒有從樓市賺錢，又點會有咁多錢蝕，不過話分兩頭，雖然我有寫睇好樓市文章，但信不信由你，樓價上升，信我的人不但不會買一件小禮物給我，甚至連多謝都唔會講一聲，樓價下跌，點解要被人鬧。

老友話我對樓市有心得，希望可以同我夾份買樓，我多謝老友雨中送傘，但我寧願老友叫我夾份買馬，好過夾份買樓，夾份買馬我仍然可以考慮，夾份買樓一定唔會。

以前我亦試過與幾個老友夾份買馬，每人一百幾十萬，本來都無傷大雅，但在銀兩不足情況下，所買的馬不是名馬，每一場都做綠葉，久唔久才跑入位置有少少獎金，最後埋單計數，唔計投注，每人都輸了百幾萬，不過輸錢有輸錢的好處，以後唔會再諗做馬主，用咁多錢仲要做綠葉，唔係幾值得，即使如此，仍然比夾份買樓好得多。

夾份買樓當然是無問題，不過，有買就有賣，當樓價上升，可能會有一些夾份買樓的人話要止賺，亦有一些話樓價繼續向好，唔應該賣。最後，如果樓價繼續上升，當日話賣樓的人會話只是提一個意見，不一定要賣，但如果樓價下跌，咁就大件事，當日話賣樓的拍檔一定嘈到不得了，既然知道有咁嘅結局，點解要夾份買樓，所以，曾經夾份買樓的老友最後可能做唔到老友，反之夾份買馬的仍然可以友誼永固。

本文為作者獨家供稿

本文為作者觀點，不代表本媒體立場。

圖：星島