文：珍寶豬

有日一位姨姨睇完醫生。

我出完藥俾佢：「二百四十呀」

佢：「好，等等呀，我有散紙呀」

佢真係拎三張散咗嘅一百蚊紙出嚟俾我...

我：「你有冇其他一百蚊紙呀？我哋唔收爛咗唔完整嘅...」

佢：「咩唔完整呀，完整㗎，係成張嚟㗎」

佢喺枱面玩砌圖...

佢：「成張嚟㗎，係少咗啲啫，你望吓」

我：「爛到咁我哋真係唔收㗎，唔好意思」

佢：「唔係錢嚟咩，點解唔收呀？唔收流通貨幣犯法㗎，你知㗎？」

屈我啦屈我啦我冇問題㗎。

我：「呢啲錢你拎去銀行啦，銀行應該幫到你」

佢：「你收咗你拎去囉，你哋都去開㗎，做乜要我自己去喎」

啲錢係你㗎嘛，你嘅嘢你自己做係咪天公地道好合理呀？

我：「我哋唔收呢啲，淨係收完整嘅，平時啲爛少少嘅收都冇問題，你呢啲係散晒碎晒呀...我點收呀...」

佢：「我係得呢啲咋，你唔要嘅同醫生講你唔收我錢啦」

你咁做即係夾硬嚟啫。

我：「你唔可以出去拎錢嗎？呢三張我真係唔會收」

佢：「啲錢唔係你袋你都冇權話事㗎啦睇死你，你問你老細呀！係咪唔要錢呀？」

正常人都應該有共識係俾完整銀紙，你夠薑就拎去街市買魚，唔好走嚟蝦我哋呢啲唔係揸刀搵食嘅人。

我：「好，我幫問醫生」

醫生就梗係叫佢食蕉啦朋友。

我出返去同佢講：「醫生都係話唔收，如果你真係淨係得呢三百嘅，你而家去銀行睇吓幫唔幫到你啦，你啲藥我KEEP住先，你OK再返嚟拎啊」

佢即刻跳制：「我要報警呀！」

我有時都幾enjoy你哋喺度做大戲，人生嘛，日日如是有咩樂趣，得閒痴吓發吓神經都幾好呀～

我點頭：「好～」

佢發爛渣拎起啲碎碎散散嘅銀紙塞入口，一路塞一路含糊講一路遠離我視線直到離開診所：「$^%%&*^」

其實我聽唔到你講乜，不過見你食得咁過癮，你開心就好啦。

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：omid armin@unsplash