文：珍寶豬

有日一位女士嚟到診所。

佢行嚟登記處同我講：「你歡唔歡迎我俾啲意見你呀？」

唔歡迎，門口嗰邊，請。

你見唔見到我有啲忙？

我：「你嚟睇醫生？登記嘅俾身份證我呀」

佢：「你好快啲搵過另一份工啦」

我：「吓？」

佢：「你個位好快俾人取代」

我：「吓？」

老闆娘你整咗容咩？做咩整到咁嘅樣呀？咁睇唔開？

佢：「你呢啲位好快俾個電腦做好EASY」

我：「你係嚟...做咩㗎？」

佢：「喺出面貼個QR code俾啲人自己登記排隊已經搞掂，你個位仲衰過做侍應阿姐，啲阿姐都有傳菜做」

你當嗰隻肥肥矮矮送菜嘅機械人死嘅？

我：「如果你想同醫生交流嘅，我要你登記先，你入到去見醫生可以慢慢同醫生講」

入去繼續發表你嘅偉論，展示你嘅智慧吧！唔駛怕醜啊～

佢：「淨係識睇細病嘅醫生都好快俾人取代，我自己少少病嘅都唔駛睇醫生，去買盒成藥食就得」

其實你需要睇醫生呀，你無啦啦行過都專登入嚟搵我講一輪，你心底裡應該係好想睇醫生㗎，如果有咩驅使你入嚟廢噏呀？

我：「唔好意思，如果你唔係要睇醫生嘅，我冇嘢幫到你」

佢：「叫醫生炒咗你啦」

我：「我同你登記，你入去同醫生講」

佢：「一個QR code搞掂你啦，慳返啲錢惠澤市民」

你就係嗰個市民嗎？

我：「身份證呀」

佢：「你覺得我係冇嘢搵嘢嚟做呀？我行過見你個樣蠢吓蠢吓賣個人情俾你」

我個樣生得蠢得罪你哋嗎？做咩成日嚟搵我麻煩...

佢：「唔駛一年你就失業啦」

我：「嗯，有心，多謝你」

佢：「到時樓就斷供，錢又冇，工又搵唔到份，年紀大想轉行都冇」

我：「嗯，有心有心」

佢：「記住我講嘅嘢，聽日我行過唔想再見到你」

佢轉身離開。

呢刻嘅我好迷惘，究竟點先顯得個樣冇咁蠢，啲人先唔會成日嚟搵我麻煩...

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：proxyclick@freepik