文：珍寶豬

有日一位媽媽帶住個仔嚟到診所。

一直都好順利登記，順利睇醫生。

到我出藥俾佢哋時...

媽媽：「啲藥水有幾多日呀？」

我：「呢度係兩日藥」

媽媽：「兩日唔夠，佢次次病親都要成個禮拜至好啲。」

我：「一係開四日藥？食完四日藥再睇吓點，四日後可以返嚟配藥」

媽媽：「好啦，係行多轉煩煩哋囉」

咁即係好定唔好呀？四唔四日藥呀？

我：「四日藥OK？四日藥要加多120蚊」

媽媽：「多兩日藥收多120蚊？」

我：「係呀」

媽媽：「藥水咋喎？」

我：「嗯」

媽媽：「藥水唔值錢㗎喎」

如果咁講，呢個世界都冇嘢值錢㗎。

我：「一係你要住兩日藥食咗睇吓點先啦，真係有需要先再返嚟配藥都得」

媽媽：「我到時配藥都係120蚊？」

我：「係呀」

媽媽：「我買兩餸飯多汁人哋都唔會收多我錢，我都分到幾餐食呀」

你係咪為呢啲而感到自豪中？

我：「我哋啲藥同藥水樽都要俾錢同藥廠訂，我哋冇得就咁俾多啲...」

媽媽拎起其中一枝藥水，扭開個蓋，同個仔講：「擘大口」

我睇住佢就咁倒咗半枝藥水落個仔口度，即刻阻止佢：「太太！一格咋！」

佢擺低剩返半枝嘅藥水上枱面：「裝返滿佢啦，你俾少咗我呀」

你係侮辱緊自己嘅智商定當我盲？

我：「太太，你唔可以咁樣俾小朋友食藥㗎，你咁樣唔跟份量去俾佢食藥，我會同醫生講返㗎」

媽媽即刻知驚：「佢冇食㗎！佢含住㗎咋，你同我裝返滿佢就得啦，唔好煩啦唔好煩啦，我以後唔㗎啦」

睇嚟已經唔係第一次係咁...

我：「我頭先俾你嘅時候係滿一枝嘅，唔會再斟㗎啦」

媽媽拎返枝藥水，同個仔講：「𦧲返出嚟啦」

你哋下次去買兩餸飯即場含住人哋啲餸呀嘛，咁樣可能唔止夠食幾餐呀...

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：stockking@freepik