文：珍寶豬

有日一家三口嚟到診所。

媽媽行埋嚟登記處登記，爸爸同個女就坐低等。

我登記時聽到同樣等緊睇醫生嘅阿姨把聲，但聽唔清楚佢講緊啲咩。

突然媽媽擰轉身講：「你同佢講英文呀，english呀」

阿姨：「佢唔識簡單中文㗎？」

媽媽：「係呀，我個女唔識中文㗎」

阿姨望望坐喺隔離個爸爸：「你老公印度定巴基人呀？」

我都忍唔住望望，輪廓唔似喎。

爸爸即刻出聲：「我香港㗎」

阿姨：「你兩個都識中文，點解你個女唔識？你哋唔俾佢讀書㗎？唔細啦喎，唔讀書唔返學犯法㗎喎」

媽媽：「我哋去咗成個月外國呀之前，佢唔記得點講中文㗎啦」

哇，成個月咁耐呀？

阿姨即刻嘴郁郁：「去完啲咩洗腦課程呀？」

媽媽：「去成個月聽嘅講嘅都唔係中文，好自然就會唔記得點講，唔係講笑呀，我自己都唔係好識講㗎，我間唔時都會聽唔明啲人講咩嘅，我都係講英文為主」

唔係呀，唔好咁謙啦，你講得好好呀，你啲中文講得好流利呀。

媽媽再講：「你同佢speak english啦，english佢ok㗎」

阿姨都唔再睬佢。

媽媽同阿女講：「你同auntie講你summer去咗邊度呀」

阿女冇理佢，媽媽面懵懵。

媽媽再同阿女講：「你同auntie講你喺嗰度識咗好多local people，食咗啲咩local food呀，同auntie講吓呀，auntie可能呢世人都未去過未見過」

我又唔信阿姨未見過呀！出面公園平時都大把講英文嘅菲律賓人喺度啦，香港國際地方嚟㗎咩，咩人都有啦。

阿姨：「你同你個女講嘢又中又英，唔怪得你個女都唔應你，梗係聽唔明你講咩啦，你講英文，叫佢介紹啲地方俾我」

咦，冇咗聲嘅？喂？喂？喂？條天線甩咗呀？

阿姨定咗眼咁望住媽媽，期待佢講一口流利嘅英文。

阿姨再講：「哎呀，梗係你哋喺香港太耐啦，賺到錢再去旅行啦，到時就記得啲英文點講㗎啦，白痴嘅至會去一陣旅行唔記得自己嘅母語啫，好彩你哋唔係白痴」

阿姨算唔算俾咗個落枱階？

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：freepik