文：珍寶豬

電話響起～

我：「你好，乜乜診所」

佢：「喂？我係頭先問你廁所喺邊嗰個靚女呀」

靚女呢兩個字可以收返埋先。

我：「你搵唔到喺邊？」

佢：「搵到，我喺門口啦」

我：「咁...？」

佢：「我喺廁所門口呀」

我：「你推門入去得㗎啦，冇鎖㗎」

佢：「我知」

要唔要請你入去，幫埋你除褲？

我：「我仲有啲咩可以幫到你？」

佢：「我都唔好意思講」

咁收線啦，bye！

我：「嗯，明白，你一陣返到嚟診所記得話我知你返咗嚟，我驚睇漏眼」

Bye！

佢：「有人喺入面大便」

去廁所唔係屙屎就屙尿㗎啦，你見到人食屎都唔駛專登打俾我㗎，我都冇興趣知。

我：「嗯...你去完廁所未？去完就返嚟啦」

佢：「佢大緊便我唔敢入去，你可唔可以嚟幫我？」

幫你啲咩？推開廁所門大叫『清場！公主要去廁所呀！』咁嗎？

我：「我可以幫到你啲咩...」

佢：「你陪我入去，你唞氣」

我：「我唔明...」

佢：「嗰個人嘅大便好大陣味呀，你陪我入去，幫我索晒啲味得唔得呀？」

你當我係人體抽氣扇嗎？你有道德有良心嗎？我打份診所助理工得萬幾蚊月薪，仲要做埋人體抽氣扇陪屎員呀？你係咪食屎食懵咗呀？

我：「或者你去另一邊嗰個啦，你行返轉頭都有個廁所」

佢：「好啦」

收線後，獲得清新寧靜嘅一刻...

過咗冇耐，診所門被打開，伴隨住一把女聲：「有人大便呀！姑娘你嚟陪我啦」

同事問我：「佢驚一個人去廁所呀？你做好心陪吓佢啦」

我：「你心地咁好，你陪啦，我唔係好人嚟，捨己為人呢啲嘢得你肯做㗎咋」

同事：「古古怪怪，唔去」

個女人繼續企喺門口：「姑娘呀」

我：「我哋唔會陪你去廁所㗎」

佢發爛渣：「取消登記啦咁，唔睇呀」

哦。

你咁大個人好應該自備人體抽氣扇。

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：freepik