【橙訊】ERROR成員郭嘉駿（193）日前同胡子彤一齊出席中環公開活動，提到隊友何啟華（Dee）合資的泰菜餐廳結業時，193坦言做生意比做藝人更「主力」，笑言：「藝人係副業咋！」

193日前出活動時，表示自己仲未同Viu續約。（圖：星島）

身兼多重身份的193，涉獵多個生意範疇，包括咖啡店、串燒店、中醫美容以及時裝品牌。他直言近年經營不易，尤其見到不少餐廳甚至自助餐在假日都要減價吸客，透露自己的咖啡店最近搬到尖沙咀，希望吸引更多遊客，不過同時亦要面對租金亦大幅上升：「到目前都未蝕錢，一蝕就執！或者未做到理想就執，不過未知幾時。我好鍾意咖啡店，仲特登去學，想堅持落去。」談到經營壓力，193坦言不單是小店，連大集團都面對倒閉潮，笑言作為藝人，與業主談判時或有少少「人情分」，希望能與業主共度時艱。

身兼咖啡店老闆的193坦言現時生意難做，面對租金上升亦有壓力。（圖：deniskwok193＠IG）

被問到未來目標，193語出驚人：「終極目標係做電視台老闆，捧自己出道！」他亦不忘搞笑談起姜濤日前提及只剩三年合約：「簽晒佢哋，然後雪佢哋，我就可以一個人獨大，哈哈！」他表示合約細節屬私事，不便透露，但推測ERROR成員的合約期大致相近。至於未來動向，193坦言現時處於「雙重身分」，既是藝人亦想做幕後。他透露尚未與ViuTV商談續約事宜，自認想法多變：「有時想簽50年合約，有時又想即刻走。」他表明仍熱愛唱歌演戲，笑言若有合適的公司，隨時可以「賣身」加入。

193話人生目標係做老闆捧自己，又講笑會簽晒MIRROR再「雪佢哋」。（圖：mirror.weare＠IG）

圖：deniskwok193＠IG、 mirror.weare＠IG、星島