文：珍寶豬

有日有一家三口嚟到診所。

媽媽行埋嚟登記處指住爸爸同阿仔：「佢哋兩個睇。」

我：「有冇喺度睇過？」

佢：「大嗰個有，細嗰個冇。」

爸爸即刻講：「我好似有喺度睇過喎，我有啲認得呢個姑娘。」

媽媽翻翻白眼：「你係細嗰個咩？阿仔未睇過呀！」

爸爸：「我點知你係講阿仔未睇過啫！」

咁都唔知，你聽力有障礙？你就企喺隔離咋喎。

爸爸講完之後就行咗去水機前，應該想借水遁緩和尷尬氣氛。

我同媽媽講：「小朋友身分證明文件有冇帶？」

爸爸好大聲問：「冇杯？杯喺邊呀？姑娘好似冇晒杯喎。」

媽媽同爸爸講：「你細聲啲得唔得呀？」

爸爸：「我驚姑娘聽唔到呀。」

媽媽：「呢度有幾大呀？點會聽唔到呀？」

我：「我哋訂咗嘅水杯未返貨呀，唔好意思。」

爸爸感到震驚：「吓？點斟水飲呀？你哋唔飲水㗎？」

媽媽嘆氣：「你可唔可以唔飲住呀？」

爸爸：「我口渴喎！」

媽媽唔理佢，我哋繼續登記。

突然聽到有啲嘈雜聲跟住係水聲，媽媽應該燥咗：「你係咪一定要咁呀？」

原來爸爸抽起咗成桶水再倒到一地都係……WTF！

媽媽同個仔講：「你做咩唔STOP爸爸呀？」

阿仔冇出聲。不如我哋夾手夾腳綁起個爸爸先啦？我唔知佢會唔會入醫生房前已經拆咗診所。

爸爸用腳踢啲水再講：「轉頭就乾啦，有開冷氣㗎嘛，唔驚喎！」

望吓啲水俾佢整到變成黑色，我真心想一拳打暈佢。

媽媽同我講：「我真係覺得好唔好意思，我有冇咩可以補救返？」

要對住佢嘅人一世係你……你嘅人生都已經咁悲慘，我只不過係拖個地啫。

我同爸爸講：「你將桶水擺埋一邊得㗎啦，我唔該你。」

爸爸：「你俾個蓋我，我同你擰返個蓋落去呀，就咁擺喺度多菌呀。」

你就咁用口飲完唔通仲好乾淨呀？你唔係覺得我會再插返落水機俾其他人飲呀？

我：「唔駛啦，唔要得㗎啦，幫我擺埋一邊得啦。」

爸爸：「你唔要？我攞走得唔得呀？」

媽媽咆哮：「你收聲坐低！」

婚後人生真係充滿樂趣生氣。

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：Pakutaso