文：珍寶豬

有日朝早一位小姐嚟到診所。

佢行埋嚟登記處：「我幾時入得去見醫生？」

我喺度諗緊佢係咪已經登記咗...

我：「你頭先登記咗？你係咩名啊？」

佢翻白眼：「我唔知你有冇登記」

玩嘢咩，有冇登記你自己都唔知，你要唔要去問吓問米婆呀？

我：「你係咩名啊？我睇睇」

佢：「XXX」

我：「你冇登記喎，你俾身份證我呀，我而家同你登記呀，登記完排第九個」

佢：「我呢，係VIP嚟嘅，唔係你話排幾多我就要等嘅」

唔等得就走囉，我哋冇迫你留喺度呀，V你個IP啦。

我：「我哋診所冇VIP，個個嚟到都係咁排隊等睇醫生，或者你去第二度睇吓有冇其他診所唔駛等咁耐」

佢：「你同我CALL白車」

救護車係俾你咁用㗎？

我：「吓？點解你需要救護車呢？」

佢：「唔CALL白車我自己去咪又係要等」

你都幾搞笑，上得救護車就一定係急到唔駛等直接可以見醫生咩，你當分流係流㗎？

我：「你唔係緊急情況我哋係唔會叫救護車㗎，你行得走得就唔應該咁做，我唔知你係因為咩而需要睇醫生啦，但如果係小問題傷風感冒咳嘅，你可以去睇普通私家診所㗎」

佢：「我係VIP都要等，我俾錢都要等，私家都係咁，我CALL白車冇問題呀」

你去睇急症唔駛錢㗎咩？唔通....

我：「我哋診所真係冇VIP，邊個同你講有VIP呢樣嘢？」

佢：「我覺得係就係㗎啦，咁嘅年紀自己係咩身份要靠人哋講我知咩？我自己好了解我自己係咩身份地位」

夢裡什麼也有，早啲返屋企覺覺豬啦。

我：「明白，不過我哋診所冇嘅，你應該去錯咗地方啦」

佢突然激動拍枱：「白車幾時到呀！」

我：「你喺出面等呀，你出到去就應該見到㗎啦，架車揸唔到入嚟㗎」

佢終於離開診所，我終於耳根清靜。

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：jcomp@Freepik