文：珍寶豬

有日一位婆婆嚟到診所。

佢一入到門口就好大聲講：「乜得今日咁多人」

佢行到入嚟並唔係直接嚟登記處，係行咗去坐位區嗰邊，面向住啲坐喺度嘅人。

我以為佢係其中一位等睇醫生病人嘅家屬，所以我冇理到佢，我繼續做自己嘢。

好快我又聽到佢把聲，佢：「喂」

我抬頭望，佢係面向住坐喺度嘅人。

佢再講：「喂！」

大家你眼望我眼都唔知發生咩事。

佢：「騰位出嚟呀」

大家都應該喺度諗緊佢係邊位病人嘅家屬咁有禮貌。

診所地方唔大，坐位唔多，人與人之間都已經坐到貼住對方膊頭，理性上應該係再冇位坐多一個人㗎啦。

佢見大家都冇反應：「打你哋靶呀，後生雷雷唔讓長輩，你哋老豆老母死咗都翻生呀」

嚟呀，我想睇呀，先打靶後翻生，OK？

我見佢咁激動就問佢：「婆婆，你係嚟睇醫生定陪人嚟睇醫生呀？」

佢一個靈活轉身大手一揮：「我駛同你交待？」

你吔屎好不好？

我：「如果你唔係睇醫生嘅麻煩你出去，你喺度騷擾到醫生睇症」

佢飛快行埋嚟診所處：「報警拉我呀！我騷擾到醫生啲咩呀？報警拉我呀嘛！X你XX，咁樣同長輩講嘢呀，我打你靶呀」

係就快啦咁多嗲。

我：「麻煩你離開診所」

佢：「出面三十幾四十度要我出去死呀？係咪要我喺正你門口死呀」

唔緊要，你都咁大年紀啦，人人都有死，唔駛驚。

我：「你唔係要睇醫生嘅請你離開診所」

佢：「我幾十歲人都未試過俾人喝我喎」

咁而家你興唔興奮，鍾唔鍾意？

我：「我哋呢度係診所，唔係一個康樂地方嚟俾你涼冷氣，邊個教你嚟私人地方涼冷氣？」

佢：「林超英囉！」

超英，你有講過啲咁嘅嘢嗎？我唔信超英係一個咁嘅人，以我認識嘅超英係一個熱到心口濕晒都冇問題嘅人嚟，點會教人去涼冷氣呢？

我：「咁你去佢屋企涼冷氣啦」

佢好唔順氣行去門口：「我就死喺你門口！」

你鍾意啦。

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：Freepik