文：珍寶豬

有日朝早一位女士嚟到診所。

佢一行埋嚟登記處就好大聲講：「醫生返咗未？」

我：「醫生已經喺度睇緊症」

佢繼續大聲：「我噚晚嚟到你哋已經熄晒燈鎖咗門」

要唔要讚吓我哋收工會熄燈好環保珍惜能源？

我冇出聲。

佢：「你哋平時都係咁嘅鐘數收工？」

我：「平日都係收八點」

佢激動指住門口：「我噚晚八點二已經喺出面」

我：「八點我哋收咗工啦，你係咪而家要睇醫生？我可以同你登記先」

佢：「我八點二喺你哋門口，拍極門你哋都冇出嚟望過我一眼，你開咩診所呀咁樣見死不救」

嗱，醫生今舖真係你唔啱啦，你唔長居喺診所係你錯，你唔24小時不眠不休診症開病假紙都係你錯，你收錢都係你錯，最錯係點解你唔識光合作用！今舖我都幫你唔到啦，等我跳返PART舞先～呢單唔係我跟開～

我：「八點後冇人喺診所啦」

佢：「冇人又點呀？你都要出嚟同我講『我哋收咗工啦，冇醫生睇啦』，唔係由得我喺度大叫大嗌拍門敲門幾個字呀」

冇人又點應到你...你平時食屎屙飯㗎？

我：「你係咪需要睇醫生呀？而家登記好快可以入去見醫生」

佢：「我而家唔睇，我仲要去返工呀，同我BOOK今晚」

我：「唔駛預約，你八點前嚟到就可以」

佢：「我收得工最快都八點二，我噚晚已經係八點二就喺出面！」

又LOOP又LOOP又LOOP...

我：「唔好意思，我哋八點就收工㗎啦，或者你去其他診所睇吓佢哋會唔會收晏啲」

佢：「睇24小時嗰啲好X貴！你俾呀？」

你冇嘢呀？同你有親咩，幾十歲人唔好咁多幻想好冇？

我：「我幫你唔到，我相信你自己可以解決到」

佢：「本身我都唔想講」

唔想講就唔好講，冇人想知。

佢繼續講：「睇勻晒你哋係最CHEAP嗰間」

知啦知啦。

佢望望牆上嘅鐘再講：「我今晚最快都係八點二嚟，我而家要去返工呀，不見不散呀」

佢急急腳離開診所。

不見即散！YEAH～

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：benzoix@freepik