文：珍寶豬

有日一位女士睇完醫生。

出藥時，我：「呢四隻每日食四...」

我都未講完，佢就急住問：「呢隻係咩嚟？」

我：「唔駛急，我會逐隻同你講係咩嚟，呢四隻每日食...」

我又未講完，佢又插咀：「我未見過呢隻藥，新㗎？係咩嚟？」

我頂你個制，你俾我講完先得唔得呀？有必要咁心急嗎？

我：「呢隻係退燒止...」

又插咀又插咀又插咀！佢：「未見過嘅？新㗎？我以前食嗰啲唔係咁嘅？」

我望望排版：「都係同一種藥」

佢：「唔係喎！以前嗰啲唔係咁樣喎，呢隻新㗎喎」

我：「藥廠唔同咗，外形顏色都會唔同咗」

佢：「做咩轉樣呀要？」

我點知啫，新鮮感得唔得呀？驚唔驚喜？意唔意外？

我：「有時唔同咗我哋都控制唔到，但都係同一隻藥嚟㗎，你可以放心，你睇吓個藥名都係一樣」

佢：「我認樣唔認名啦，你俾返以前我食開嘅我啦」

我：「我哋冇晒啦，而家轉咗係呢隻...」

佢：「轉藥又唔同我講，我淨係認得個樣嘅要我點食呀？我會食錯藥㗎」

你個人就真係食錯藥啦。

我：「你睇返藥袋上面寫嘅嚟食，你有發燒有頭痛骨痛就食退燒止痛藥，有流鼻水就食收鼻水，如果你有需求嘅都可以跟返時間食晒啲藥嘅，每日四次每次每樣一粒咁食」

佢：「藥有三分毒，邊可以食咁多，你份人都幾陰毒」

你自己走入嚟登記睇醫生，自己俾錢拎藥食，你自己申請毒你自己嘅算唔算陰自己？

我：「你有需要就食啦，你決定啦，唔係抗生素可以隨時停」

佢：「你俾返我食開嘅我先得呀，我睇住呢啲藥覺得佢好陌生呀，唔順眼呀」

我：「你屋企仲有冇舊嗰隻止痛退燒藥呀？」

佢：「有呀」

我：「你影張相曬出嚟痴落呢個新藥袋度」

佢諗咗陣自己點咗幾下頭，順利收錢！

你鍾意嘅話都可以用呢個方法將自己或身邊人變成你睇得順眼嘅樣啊。

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：jcomp@freepik