文：珍寶豬

有日一位女士嚟到診所。

佢行埋嚟登記處問我：「我嚟唔睇醫生嘅」

咁你走啦，嚟同我講經呀？

我：「有咩幫到你？」

佢：「唔見醫生可唔可以睇吓我有冇病？」

你病到我都睇得出你好病。

我：「唔睇醫生嘅話，我都冇嘢可以幫到你...」

佢企喺度諗咗陣。

跟住同我講咗句好有智慧嘅說話...

佢：「醫生似唔似醫生」

我可以點答？線上等。

我：「你要唔要登記呀？」

佢：「我唔可以睇醫生㗎，一俾佢哋發現我睇醫生就麻煩啦」

我：「佢哋？邊個佢哋？」

佢：「身體入面唔好嘅嘢」

你睇醫生啦！你睇醫生啦！你需要睇醫生呀！

佢再講：「唔俾佢哋知先可以消滅佢哋，一俾佢哋知咗佢哋就會同我開戰㗎啦，我分分鐘會咁樣死」

你睇醫生啦！你睇醫生啦！你超級需要睇醫生呀！

我：「但係你唔睇醫生嘅話，醫生都唔知你有咩事幫唔到你...」

佢：「所以我咪問你醫生似唔似醫生」

我：「有咩關係...我唔係好明」

佢嘆咗一口氣：「俾佢哋知我睇醫生我會死，我講咗啦，所以我先唔俾得佢哋知我睇醫生，要醫生唔似醫生咁咪唔會俾佢哋發現，我覺得睇醫生做body check嘅人都好蠢係嘥錢，你俾佢哋知道你去做body check，佢哋一定會匿埋晒唔俾你check到㗎」

我：「咁都有唔少人係做body check又發現到有事嘅...」

佢：「因為多到匿唔埋啦嘛，多到咁就唔駛醫㗎啦，最後都係死」

...咁你都唔駛睇醫生啦。

我：「如果你唔登記睇醫生嘅，我都應該冇其他嘢幫到你...」

佢：「唔會呀，你幫咗我好大忙呀！我嚟同你講吓嘢嚇吓佢哋，佢哋就唔會咁囂張啦」

佢開心轉身離開診所...

我應唔應該覺得開心幫到佢？

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：stockking@freepik