文：珍寶豬

有日一位女士嚟到診所。

好順利咁登記完等睇醫生。

等等下，女士突然彈起身『哇』咗一聲。

佢行埋嚟同我講：「你有冇M巾呀？」

診所係冇提供的，但相信問得都應該係突然有需要，我即刻拎自己私伙嘢俾佢。

我拎俾佢：「洗手間喺出面轉右」

點知佢冇去到洗手間，直接行返埋位繼續坐...

雖然覺得有啲怪，但個人喜好習慣嘅嘢，由佢啦。

再坐坐下，佢又再行埋嚟問我：「你仲有冇呀？」

我：「有冇咩呀？」

佢：「M巾呀」

我：「我頭先咪俾咗你囉」

佢：「你冇俾過我呀」

我見鬼嗎？你有孖生姐妹定有精神分裂？介唔介意叫返頭先嗰個返嚟？裂少陣得唔得？

我：「...我冇M巾呀」

佢：「你會冇Ｍ巾？」

我：「係呀，冇呀，頭先俾咗你就冇啦」

佢：「你咁大間診所得一塊？」

你認啦咩？你頭先又話我冇俾你？

我：「診所冇提供嘅，頭先我俾你嗰塊都係我自己嘅」

佢即刻掉返塊M巾俾我：「你俾你自己啲三流嘢用死我你孭得起？」

你又啱，個個都興咁樣嘅，以後大家冷漠啲唔做唔錯就最好，現今社會睇嚟應該都要係咁嘅態度？

我：「你唔需要嘅好多謝你俾返我，麻煩你坐低等叫名睇醫生」

佢敲枱：「我要M巾呀」

我：「我哋診所冇提供M巾，亦都冇賣M巾，你有需要可以自己去買」

佢：「我要醫生嘅」

我：「我哋醫生係男醫生，或者你一陣入去睇醫生可以問問醫生」

醫生講一句嘢好過我講一百句啦，有咩波交返俾醫生得㗎啦，YEAH！

佢：「男醫生？」

我：「係呀，我哋醫生一直都係男醫生」

佢個樣好疑惑咁行去坐低...

唔駛擔心喎，男醫生都冇問題㗎喎，醫生是最好的。

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：jcomp@freepik