數年前遊戲《動物森友會》大熱，不少人經常去外島玩，大家又知不知道現實中，香港有263個外島，不少外島更擁有世界級壯麗風景。「我哋覺得泰國、新西蘭，各個地方可以因為大自然吸引咁多旅客去當地，why not香港唔得？」山系Youtuber Kate(林樂儀)為了向世界分享香港的自然美景，2年多前決定創業，開辦外島導嘗團，目標成為旅客訪港「Top 10 things must do」活動之一，去年高峰單月淨利潤接近20萬元。

Kate認為香港的自然景色不比其他地方差。圖：受訪者提供

Kate創業故事由一次旅程講起，當時她隻身到新西蘭遊山玩水，「你知道新西蘭最出名就係山山水水，咁其中一座山我行到上去嘅時候我就覺得，佢固然好靚啦，但係更加令我諗起，咦，香港都好似有啲好靚嘅地方。」回港後，Kate毅然辭去原有的工作，成為全職Youtuber，在港尋幽探秘，拍短片介紹香港的隱世美景，至今累積近12萬訂閱。

Kate經常收到觀眾留言，提及「睇咗當去」，她聽到後就悶悶不樂；加上本港租用快艇出海費用昂貴，於是在2022年5月與男朋友，斥資1萬元找朋友建立網站，創辦「香港夾船平台」(Splitdyboat)。沒錯，公司成立最初期主要提供「併船」服務，讓不同客人分攤租用快艇費用，接觸本港的外島。

Kate稱，這盤生意一開始已經很困難。「我哋公司係要同人哋講，你要相信聽日兩點鐘，有人同你一齊想去橫州，呢個教育係好難啦已經」。如果曾參加過本地遊，相信會試過「不夠人成團」的情況，她們首先要改變客人這個思維。第二個困難，是兩位創辦人並非漁民，亦不會駕駛船隻。兩位廿多歲的「靚仔靚妹」，曾經在冬天到離島逐家逐戶拍門，邀請對方與她們合作，期間食了不少閉門羹。「到後來，我哋逐漸用實力去證明到船家睇，我哋得架，我哋真係有生意嚟到，咁啲船家就開始同我哋合作啦。」

公司目標客群除了本地人，還包括訪港的外國旅客。圖：搵錢

不過，礙於政府近年更改法例，禁止快艇提供點對點載客服務；加上兩位創辦人都覺得，要推廣香港自然景點，不應該載客人到目的地就結束，最重要是要有導賞員的講解，才能增加整件事的感染力和傳播力，「我哋要啲客嚟完之後，開心到要返屋企同啲親朋戚友，姨婆姑姐講，喂！下次嚟香港一定要玩呢個活動呀」。Splitdyboat遂轉型為主打導賞團的本地遊公司，並開始培育自己的導賞團隊，提供獨木舟團、直立板團、跳島導賞、泳綑體驗等服務。

看到這裡大家或者會問，坊間也有不少海上導賞團，該公司與它們有何不同？Kate解釋，第一是公司定位不限於香港人，還有外國旅客，所以不受出發時間限制，儘管平日都能成團。第二是坊間導賞團通常使用大型船隻，船速慢且不能靠近岸邊；她們則使用快艇，有一定速度之餘，更可靈活穿插「個體驗係完全不同海蝕洞，唔同，你睇啲嘢都唔同，抬高頭睇六角柱石，同你離遠十幾廿米睇，嗰個感覺已經唔同。」

第三是她們對導賞員有很高要求，包括要精通兩文三語，接待來自世界各地旅客，亦要熱愛香港，「因為你要表現到好愛香港，你先可以令參加者感受到件事，所以我哋嘅導賞員，我相信嗰種熱情其他團體係好難模仿到。」訪問當天，Kate正好帶隊出發其招牌的地質公園導賞團，期間不斷中英同步講解；加上語氣生動，令人聯想到迪士尼樂園「森林河流之旅」在船上講故事的哥哥姐姐。Kate表示：「以前嘅地質導賞，好多人會覺得聽書咁，一舊石頭有乜咁得意姐」，「咁但係我哋知道呢件事好amazing，就要包裝佢，令到佢哋覺得，係喎，好鬼勁喎，原來有一個超級大火山曾經係香港。」

Kate的導賞團使用快艇，速度快且靈活。圖：受訪者提供

Kate坦言這盤生意一開始不被看好，以傳統本地遊為例，當準備好所有東西，可能前一日卻要取消行程和全額退款，她們亦曾就此偏為沮喪。兩位創辦人均相信她們的方向正確。「以前我覺得自己孤軍作戰，但當你愈做愈大，先發現原來有好多人其實心底裡面嘅諗法，藏咗係心裡面好耐，終於遇到一班人同我哋一齊咁鍾意香港，願意付出200分嘅努力一齊去推廣。」

一步一腳印，撇除社交平台宣傳成本，公司去年最高峰單月利潤達20萬元。以公司主打的地質公園四洞火山導賞團為例，數個月接待了二、三千名旅客。「我哋今年嘅目標係1萬人，所以我哋相信，呢個團係可以變成另一個天星小輪，另一個Big Bus，總之你嚟香港，你一定會想參加呢個行程，呢個係我哋嘅目標。」 Kate有信心地說。

目前公司約五成參加者是本地客，內地客和海外客各佔餘下一半。Kate笑言來自五湖四海的旅客中，新加坡人在行程中表現特別興奮，「香港同新加坡好似，都係城市，都係金融中心，但佢哋(大家)無諗過，原來香港仲有一個殺手鐧，叫做山同海。」她說，旅客到訪香港，通常會到迪士尼樂園、海洋公園、坐天星小輪，她的目標是令到香港地質公園導賞團，亦成為旅客來港必定參與的活動之一，讓他們認識到香港大自然有多漂亮。

西貢是香港的後花園，地質公園導賞團是公司的主打產品。圖：受訪者提供