文：珍寶豬

有日一位小姐嚟到診所。

佢行埋嚟登記處同我講：「縫針醫生縫嘅？」

我：「我哋冇縫針啊」

佢：「醫生唔會唔識呀，下？」

我：「我哋係冇工具啊」

佢：「診所都冇嘅，邊度有？」

我有釘書機，要唔要借你釘兩口？

我：「我哋診所冇，你可以去其他診所問問」

佢：「呢條邨得你一間，你係咪想抬價耍我咋」

我：「我哋真係冇呀」

佢：「唔駛醫生同我止血㗎，冇血嘅」

我：「我哋冇縫針...」

佢：「幾針嘅事」

縫幾針唔駛工具，唔通可以用牙咬呀？你唔去搵釘耳窿嘅人幫你？

我：「都需要工具...」

佢：「我撞爆咗頭好多年啦，血都唔駛你哋同我止啦，功夫都做少浸」

你應該唔係撞爆個頭咁簡單，應該係撞到壞嘛。

我：「好多年？你而家先縫針？」

佢：「見有啲漏風，成日見頭赤赤，我諗係關撞爆頭壇嘢事」

你漏嘅唔係風...係智慧...唔好浪費錢去搵醫生縫針啦，俾晒啲首飾我，我幫你祈福啦。

我：「你需唔需要俾醫生檢查吓？如果要嘅我同你登記，你俾身份證我就OK」

佢：「唔駛喎，我都知咩事啦，縫幾針咪得」

我：「明白，我哋幫你唔到，真係唔好意思，麻煩你去第二間問問」

佢：「我自己買料嚟俾醫生得唔得呢又，你認為點？」

你自己買得嘅，唔爭在自己幫自己縫？你又認為點？

我：「我哋唔接受嘅，你去問其他診所呀，唔好意思」

佢：「係咪打開門口做生意㗎，唔做生意閂門啦，買埋料都唔做生意，成條邨得你一間唔憂做到咁呀？」

係呀，你都係想聽我咁答你啫，係呀係呀係呀唔憂做呀，你見你講咁耐，醫生都冇出嚟望過咩事就知啦，我私人醒塊膠布你貼住個漏風位好冇？你走啦好冇？

我：「如果你有需要可以俾醫生睇吓檢查，有需要都可以轉介你」

佢：「Ｘ！」

講完句粗口，佢就瀟灑轉身離開診所。

你爭塊膠布未拎呀～

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：partystock@freepik