文：珍寶豬

有日一位女士嚟到診所。

佢行埋嚟登記處問我：「有冇水痘藥水買呀？」

我：「要本人嚟睇醫生先會開藥」

佢：「佢出咗幾粒水痘，我想就咁要枝水痘藥水拎返去同佢搽」

我：「冇得就咁配啊，要俾醫生睇咗先」

佢擰轉身望向坐喺度等緊睇醫生嘅人。

目標發現！佢即刻行去兩母子前面，同佢哋講：「你哋一陣睇醫生可唔可以同醫生講要水痘藥水？」

我即刻阻止佢，佢真係當我死㗎喎：「小姐，你咁樣唔得㗎」

佢冇理我，繼續同母子講：「我可以俾返錢你」

我繼續阻止佢：「醫生要見到真係生水痘先會開藥，唔係講就有㗎」

佢繼續：「你同醫生講實會俾，會俾錢，有錢賺嘅嘢唔會唔賣呀」

佢真係當我死㗎喎！

母子耍手擰頭拒絕。

佢又走去阿婆前面，阿婆搶先開口：「我幾十歲人冇水痘生啦，你自己帶你個細路嚟啦，生水痘會破相㗎，係女嘅嫁唔去㗎」

佢：「佢絕咗育唔駛嫁啦」

什麼？絕育？

阿婆似乎意識到唔多對路，即刻收聲逃避佢嘅視線。

我：「小姐，麻煩你有需要就帶個小朋友嚟睇醫生，你問其他人都冇用，醫生見唔到水痘係唔會開藥」

佢：「我有影相呀，俾醫生睇又得唔得呀？」

我：「唔得呀，要親自嚟呀」

佢拎起部電話：「我有相呀」

佢隊部電話埋嚟俾我睇，我冇好認真咁望...但望望吓咁多毛嘅，咁粉嫩嘅...

我：「你係咪俾錯狗仔相我睇？」

佢望望自己部電話：「冇錯呀，呢幾粒呀」

唔好意思，我想一腳伸你去獸醫診所...

我：「我哋係睇人嘅西醫診所，你隻狗睇醫生係要去睇獸醫」

佢指住張相：「獸醫啲藥同人藥一樣，價錢可以貴十倍㗎，我喺你度買枝水痘藥慳返啲錢夠佢去睇十次獸醫」

我：「我未聽過狗有水痘...」

佢放大張相俾我睇：「呢啲水痘呀」

我搲爆頭。

我：「...呢粒應該係佢嘅乳頭」

佢縮返細張相：「咁多粒喎？」

我點頭：「嗯，狗應該係有咁多粒...水痘都唔會生到咁對稱啦...」

佢縮返個人出診所了。

我幫你慳咗睇獸醫錢，唔該都冇句就走人咁冇禮貌，哼！

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：azerbaijan_stockers@freepik