文：珍寶豬

有日一位女士嚟到診所。

登記睇醫生一直都好順利，直到出藥...

講完啲藥點食嘅我：「二百五十」

佢拎出一張信用卡擺喺我面前。

我：「唔好意思，我哋淨係收現金」

佢：「我冇 Cash喎」

我：「你可以去附近撳機之後再返嚟拎藥」

佢：「我冇Cash撳呀」

可怒也！咁大個人銀行戶口連三百蚊都冇？你玩嘢呀？

佢再講：「碌我張卡順便同我碌多二千蚊呀」

俾我嘅tips嚟呀？

我：「我哋只收現金，冇信用卡機」

佢指住櫃入面嘅醫療卡機：「冇信用卡機？呢部咩嚟？」

我：「醫療卡嘅機嚟，我哋真係冇信用卡機」

佢：「你同我碌二千二百五十啦」

我已經燥燥哋：「我哋唔收信用卡，淨係收現金，你嘅診金連藥係二百五十，你淨係俾二百五十現金我就得㗎啦，唔係二千幾」

佢：「二千蚊係你俾我呀，唔係我俾你，你碌我信用卡俾二千我，你唔明呀？」

我唔明，點解我要咁做，雖然我生得好大舊，但點睇都唔似一部提款機呀？

佢唔耐煩拍拍張信用卡：「快啲好冇？」

我：「我真係幫你唔到，如果你想要藥同假紙嘅就麻煩你俾二百五十現金我」

佢：「你唔碌我張卡俾二千蚊我，我邊有現金俾你呀？我得呢張卡，我得呢張卡呀！」

我打你個肺...大大隻字寫到明只收現金，登記嗰陣又唔講，睇完先ee哦哦...

我：「我幫你唔到啦，或者你問朋友屋企人借錢啦，袋藥我擺住喺度先，你今日8點前返嚟都可以」

佢：「你借住二千蚊俾我先又得唔得呢？」

我似係你朋友嗎？我先冇啲好似你咁嘅朋友呀！

我是絕情人：「唔得」

佢：「一拍兩散我唔要囉」

講完佢就離開咗診所。

其實係咪另類借錢黨？

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：mdjaff@freepik