文：珍寶豬

有日一個家庭嚟到診所。

啊，唔係...應該係成個家族咁滯，診所已經唔大，仲要一家十幾口一齊嚟到，約咗醫生食團年飯呀？

家族之一嘅一位女士行埋嚟登記處問：「等幾耐呀？」

我：「而家登記嘅排第八個」

佢問家族成員：「等唔等呀？八個」

成員B：「等啦，都要睇㗎」

成員C：「唔睇都冇問題呀，人有抵抗力」

抵抗力呀啦？嚟診所講經呀？

成員B：「有藥食快啲好呀」

成員C：「你食咁多年藥有冇好過先？」

咦，有花生食？係咪準備打交？

成員C再講：「藥係有效，你就唔會咁啦」

不如大家都係走啦好冇？你一家十幾口一人一句嘅話，到時嘈過街市...

女士出聲：「STOP！」

家族成員們即刻全部退後一小步。

成員C就細細聲講：「又係你問睇唔睇，我俾意見又唔得嘅，懶民主」

女士：「唔睇囉，夠民主？」

成員C就指向成員B：「佢話睇㗎，你唔聽佢講呀？聽我話暗戀我呀？有咩冬瓜豆腐嗰陣入我數呀？我擔當唔起㗎」

究竟呢堆人係咩關係...

女士：「STOP！」

成員D：「一人少句啦少句啦，我哋喺街呀，唔好咁張揚俾人知呀」

哇，你哋一行十幾人咁浩浩蕩蕩好難唔張揚喎。

成員E：「係呀係呀，快啲解決佢啦」

邊個佢？是咪我？我好驚...

女士望住我。

喂！我好驚呀！唔好殺我呀！我今日仲未食飽飯呀！

女士問我：「八個即係要等幾耐？」

我口都窒埋：「冇..一定...嘅時間，個個睇醫生時間都..唔同，可能每個人預五至十分鐘左右」

成員C：「幫你計埋最快都八個字！」

成員D向左右隔離啲人講：「八個字會俾人追到，我哋就嚟俾人發現」

成員B：「醫病緊要呀」

女士又再一次：「STOP！」

女士拎出成員D嘅身份證細細聲同我講：「佢有唔妥，精神嗰面」

啊！我Get到咩事啦！嚇死我咩！

話有抵抗力嗰位，同我拉佢出去打，狠狠咁打！

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：freepik