【橙訊】男團MIRROR近日積極為新團歌《手印》做宣傳，日前組合就去到商台接受《叱咤樂壇》訪問，不過隊長Lokman及三位成員Anson Lo、Ian及Stanley就因為有其他工作在身而缺席，但仍然無損一班鏡粉漏夜去霸位支持，可惜就引來附近住戶報警投訴。

MIRROR日前接受《叱咤樂壇》訪問，宣傳新歌。（圖：星島日報）

MIRROR在訪問入面分享拍新歌MV的幕後笑料及對新歌的看法，當中Frankie就話聽完新歌後回想起由出道到現在大家經歷不同挫折，猶如走馬燈一樣，搞到他在MV入面都忍不住流淚，被隊友笑封為「流淚輝」、「crying輝」。曾經表示最鍾意這首團歌的姜濤就指，覺得以往MIRROR的歌曲都給人溫暖的感覺，但新歌卻坦白告訴大家每一個團隊都會有爭執：「踏入第七年，都想好真實咁話俾觀眾聽，我哋唔係真係完全時時刻刻好團結，我哋都會喺工作上有爭執，當我哋12個一齊嘅時候，點都好，我哋都係對外，來到第七年我哋都會好團結咁繼續向前行。」

姜濤承認組合有爭執，但都行足七年。（圖：星島日報）

另外講起今次有彭秀慧執導新歌MV，MIRROR大讚如同拍戲一樣，姜濤更爆料MV有幕AK及Edan打交，原本是由他及Ian上演，但彭導留意到AK有「嬲爆」團火，決定暫時換人，姜濤轉做和事佬拉開二人。還有一幕是彭秀慧要求他們扮演準備比賽的模樣，有人着襪，有人抹頭盔，而Frankie就做熱身動作，點知釘鞋一踢落地就發出「撻撻聲」，搞到在場所有人都要忍笑很辛苦。

組合分享拍MV時笑料百出。（圖：mirror.weare@IG）

圖：星島日報, mirror.weare@IG