文：湯文亮

近日不少人關心最新《財政預算案》，財爺如何扭盡六壬，減少財赤。一般人以為最好方法就是開源節流，開源就是加稅，節流就是減公務員薪酬，而社會要求公務員減薪的聲音很大，今年如果唔搞好財赤，明年一定要減薪。

有茶餐廳老闆話，不一定加稅就是開源，減稅也可以開源，以前的茶餐廳沒有下午茶時段，生意唔係幾好，後來唔知邊個發明，每日兩點半到六點是下午茶時間，各項餐飲都減價，令到不少茶餐廳的營業額增加，現在，差不多所有茶餐廳都有下午茶時段。

財赤最大一個原因就是冇人買地，而冇人買地的最重要原因就是冇人買樓，地產商賣唔到樓當然唔會買地，所以，政府要推行一些政策吸引市民買樓，最直接而又有效就是減印花稅，政府可以嘗試減收一半印花稅，為期2至3年，吸引市民買樓，新樓好賣，地產商就會買地，否則，就算有地產商現在願意買地，都唔會俾好價，政府雖然損失了一些印花稅，但買樓的人多了，就算不能彌補全部，但損失都會減少很多。

最重要就是多了人買樓，地產商的新樓如果賣得出，就會積極投地，賣地收入不但可以彌補印花稅損失，甚至可以降低財赤，政府可以考慮一下。

現在樓市好似水渠淤塞，一定要用通渠劑，減收印花稅就是通渠劑，當水渠暢通之後，就不需要用通渠劑，當樓市回復正常，市民願意買樓，就可以回復正常印花稅。

本文為作者獨家供稿

本文為作者觀點，不代表本媒體立場。

圖：星島