【橙訊】現年43歲的游莨維（一蚊Joe）近日宣布結束與無綫電視（TVB）18年賓主關係，日前於商台節目《1圈圈》中透露離巢主因，直言薪酬調整與家庭經濟壓力促使他決心轉行。2006年參加《一擲千金》因只贏取1元獎金當場灑淚而一夜成名的他，坦言：「喺TVB合約3年又3年（續約），已經6個3年，會諗下一個3年又會點，又見唔到自己個位，不如走。」  

TVB薪酬調整與家庭經濟壓力促使游莨維決心轉行（圖：IG@1masterjoe）

游莨維透露，疫情期間積蓄「使到見底」，疫情後雖工作機會回升，公司卻要求調整薪酬，他將手放腰間比劃「橫刀一切」手勢，直言減幅難以負荷：「點止落差，可以形容真係可能你做保安、洗碗，我唔係貶低呢個行業，覺得薪酬未必養得掂我自己，自己都養唔掂更養唔到頭家。」育有8歲及5歲子女的他，最終決定與TVB結束合約。  

上網台分享當年遊戲心路歷程（圖：YouTube @1圈圈 節目截圖）

為謀出路，他離巢前已考取「地產、地盤、保安、保險」四大行業牌照，並計劃重返老本行保險業。他引述太太鼓勵：「一個男人只要你肯做，照計應唔會搵唔到食嘅』。」游莨維自信表示：「打開報紙最多人請就係呢幾個行業，我信我想做唔會冇嘢做。」  

游莨維育有一子一女（圖：IG@1masterjoe）

回首入行契機，游莨維憶述2006年參與《一擲千金》時僅26歲，原盼贏獎金助家人供樓，未料因策略失誤僅獲1元，當場落淚被封「一蚊Joe」。他坦言：「阿媽有唔開心，但就俾咗個offer我，就係如果養得掂你自己咪去囉，當初都係俾3年時間自己冇成績就走。」  

當年參加《一擲千金》（圖：《一擲千金》節目截圖）

談及主持《東張西望》12年的爭議，他重提中環雲咸街槍擊案採訪後，因在社交平台發文批評港聞版記者而遭抨擊：「係自己做得唔係咁好，回首可以做好啲。」並反思節目定位：「做《東張》確實俾人覺得新聞唔係新聞，娛樂唔係娛樂，會被人睇唔起。」  

主持《東張》惹爭議（圖：《東張西望》節目截圖）

面對負評，他豁達表示：「人生不如意事十常八九，如一兩件事唔開心咁你唔好開心嘞。」如今揮別電視台，游莨維將以「四大牌照」開啟事業新章，昔日「一蚊Joe」的眼淚，終化作轉型決心。

圖：《東張西望》節目截圖、《一擲千金》節目截圖、YouTube @1圈圈 節目截圖、IG@1masterjoe