【橙訊】41歲李彩華（Rain）早年開始北上掘金，成功憑住內地劇《回家的誘惑》爆紅，工作一個接一個，去到2018年更加認識到從商的前夫黃彥書，兩人拍拖半年就閃婚，可惜一個疫情令二人長期分隔兩地，最後離婚收場，結束19個月婚姻。被傳身家過2億的Rain向來都熱愛滑雪，沒想到近日她去北海道滑雪時不慎意外跌入一個逾兩米深的洞穴，幸好有外國人出手相救才脫險。

Rain上大陸發展之後超富貴。（圖：李彩華＠微博）

Rain日前在社交平台分享自己滑雪的相片及影片，見到她在二世古最大的比羅夫滑雪場上面以一身粉紅豹紋造型登場，加上粉紅色LV滑雪眼罩，非常搶眼。片入面她舉起單手、曲起單腳興奮地在富士山前打卡。而在她公開的影片，見到滑雪期間她雙手攤開又做出大心心手勢，又不停撥動雙手似是在雪地上跳舞一樣。沒想到後來竟然遇上意外。

著到成身粉紅色跟富士山影相夠搶眼。（圖：rainli1111＠IG）

Rain昨日分享經歷：「今日真係算好好彩，完全冇諗過跌落個窿呢件事係會發生喺我身上，個窿起碼兩米幾，講真拍戲都冇咁驚險，萬幸嘅係個窿附近啱啱好有幾個外國人，我跌咗落去即刻嗌helphelp，佢哋就即刻衝過嚟，以佢哋咁強壯嘅身形，都要幾個人先拉到我上嚟，如果冇佢哋喺度……真係……God Bless！」網民見到Rain的帖文都表示擔心，留言：「有無受傷」、「Oh 妳有冇事呀」、「睇到張相你有驚險的一刻真係心驚！感恩附近有人救了你，幸好人沒事，回來要慶祝一下」。不過意外發生後，Rain都有在限時動態貼出跟好友飲啤酒及食火鍋的短片，表示：「安全到家，要慶祝一下！」

Rain重提自己的驚險意外，令網民都表示擔心。（圖：rainli1111＠IG）

圖：rainli1111＠IG, 李彩華＠微博