文：珍寶豬

有日診所都有唔少人喺度，我哋都忙到出晒煙，

突然有位姨姨大叫：「幾時輪到我呀？我等咗好X耐啦！」

我：「你係咩名啊？我幫你睇睇排第幾」

佢：「乜乜乜呀！痴X線！等咁耐想等死我呀？」

我搵嚟搵去都搵唔到佢個名：「你係乜乜乜？你幾時登記㗎？我唔見有你名嘅？」

佢：「痴X線咩？我等咁耐你同我講唔見我名？」

我：「你冷靜啲先，你過嚟俾身份證我睇睇先，唔好咁激動住」

佢：「唔X激動唔係人啦下，等咗咁X耐，起碼幾個鐘啦！」

幾個鐘先出聲？你又真係幾等得喎，佩服佩服。

我：「你過嚟俾身份證我先啦」

佢行埋嚟：「俾身份證你又點呀？你做到啲咩呀？你識做啲咩呀？」

俾啦煩，唔俾我嘅咪又係繼續冇得睇醫生，你嘅時間一分一秒流逝緊呀。

佢放低身份證：「頭先都冇要身份證啦，而家又要，請埋啲咩X人返嚟呀？咩都唔識做，做啲嘢都做唔好，庇護工場啲人都醒過你呀」

係呀？你喺庇護工場做㗎？

我check咗佢身份證號碼：「小姐，你未喺度睇過㗎喎？你頭先真係有登記咩？你係點登記呀？」

佢：「咪今朝跟住條隊入嚟囉！」

我：「跟住條隊入嚟診所，之後呢？」

佢：「之後咪等到而家囉！痴X線！仲問呀你？」

我好似想像到個畫面，你跟住啲人入到嚟，戇戇吓冇排隊登記就自己去坐低，一直等呀等呀等，就到而家...

我：「你係咪一入嚟就自己行去坐低？」

佢：「如果唔係我邊有位坐呀？得咁少位」

高手，厲害了。

我：「我而家同你登記，你而家先係有登記睇醫生，登記完都係要再等，你O唔OK？」

佢望望後面啲位：「冇位坐啦！點等呀？仲等咩呀？我等咗幾個鐘啦！」

我：「你今朝都冇登記過」

佢拎返張身份證離開診所：「冇你老X呀！痴X線公司！」

Bye，以後唔好咁豬啦。

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：stockking@freepik