文：珍寶豬

有日一位先生嚟到診所。

佢行埋嚟登記處好焦急咁講：「醫生呢？醫生返咗未？我搵佢寫信呀！」

我：「醫生喺度㗎啦，你有冇喺度睇過？」

佢：「有有有，我身份證號碼xxxxxxx」

我連身份證號碼都未入完，佢就好急咁講：「睇得未呀？我老細催呀」

你老細企咗喺邊催你？我見唔到聽唔到嘅？

我：「未有咁快睇得呀，仲有其他人喺度等緊睇醫生呀，你排第五個」

佢：「我寫張信㗎咋，潦幾隻字簽個名，好快，俾我睇先呀」

我：「你要寫咩信呀？」

佢：「我要張信寫我一日要二千蚊」

我真心唔明：「吓？一日二千蚊？我哋睇醫生唔駛咁貴喎，我哋收二百五十」

佢：「寫我人工一日至少要二千蚊呀，寫俾我老細呀」

佢望望電話：「我老細打嚟啦催啦佢催啦佢，快啲寫張信俾我拎返去俾我老細呀唔該你呀」

我：「我唔明點樣寫你人工一日要二千蚊喎，你人工幾多同睇醫生有咩關係？」

佢：「我人工冇二千蚊我會抑鬱我會焦慮我會唔開心呀，咪寫我人工要係一日至少有二千蚊我先做到嘢，醫生簽個名俾我交俾老細就得啦，可唔可以快啲寫張信俾我呀」

不如我都join你個痴線大膽諗法呀？我哋一齊入醫生房迫醫生加人工！

我：「我諗醫生幫你唔到...」

佢：「點解呀？我抑鬱呀！得幾百蚊人工抑鬱呀！生活唔到呀！」

我：「如果你係有需要睇專科嘅，醫生可以寫轉介信俾你。但係醫生就一定寫唔到你想要嘅二千蚊日薪證明信俾你...」

佢：「我同咗我老細講我有張信㗎！」

所以又係我哋嘅問題？你唔止抑鬱焦慮啦，你直程有埋妄想症。

我：「我哋真係幫你唔到」

佢攤大手板：「我點呀？你就咁講句幫我唔到叫我兩手揈揈走呀？」

我：「有需要睇醫生拎轉介信去專科嘅可以再嚟，卡片俾你，應診時間有寫喺度」

佢望住我擺喺枱面嘅卡片：「真心咩？」

我：「係，真心嘅」

佢發爛渣拎起張卡片掉返俾我：「真你XX呀！」

講完佢又離開咗診所。

加多樣，躁狂？

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：krakenimages.com@freepik