【橙訊】《東張西望》昨日（23日）報道一宗港人北上深圳睇牙不幸遇上疑似無良牙醫的慘事。報料者王小姐透露自己在香港睇牙醫得知要剝牙後，為了保留牙齒而決定北上尋醫，點知弄巧反拙，該名內地牙醫疑似手勢不佳，更令她進食期間突然甩牙！

王小姐向節目組表示自己北上睇牙，疑似遇上無良牙醫。（圖：《東張西望》截圖）

王小姐向節目組提到補牙過程涉及杜牙根及套牙冠等，起初北上數次，做完手術後仍然覺得牙痛，去到第五次再就診時，負責牙醫就表示會盡力幫她，點知去到第七次做完手術之後，王小姐覺得「痛到不得了，半邊身體直到頭部都痛」，決定向牙醫問個究竟，診所方面竟然以一句「冇得解決。」回應，令王小姐嬲爆表示牙痛對生活及精神有影響「痛到飯都食唔落。」

王小姐有次進食時感到有異物，吐出時發現是其中一隻牙的牙冠爆裂。（圖：《東張西望》截圖）

有次王小姐食魚時，突然咬到不明物體，吐出後發現原來是其中一隻牙的牙冠爆裂！王小姐透露前後足足補九次：「無了期杜牙根。」去到第九次她決定北上向深圳牙科診所負責人要求退錢，但王小姐就聲稱對方呼喝：「你夠膽喺我個場搞事，我搵公安拉你。」後來節目組就帶王小姐去香港註冊牙醫診所睇牙，牙醫表示有可能是過去診療時器具不乾淨而令細菌入牙根，導致牙根、牙齦發炎，更要將牙齒剝走，令王小姐無奈：「我而家乜嘢信心都冇。」

香港牙醫表示可能牙科器具不乾淨，令細菌入牙根。（圖：《東張西望》截圖）

圖：《東張西望》截圖