【橙訊】周殷廷組合JFYT成員之一陳鈺麟（床哥），早前開直播為組合入圍叱咤頒獎禮「我最喜愛的男歌手」及「我最喜愛的組合」拉票時，疑似「消費」MIRROR成員呂爵安（Edan），指一班爵屎（Edan粉絲名稱）為偶像拉票時，Edan卻在台灣跟「大馬女神」林明禎行夜市，更叫爵屎轉投YT及JFYT，惹來一眾鏡粉不滿，就連姜濤都出面斥床哥「冇品」。

姜濤日前留言指床哥「無品」。（圖：keung_show@IG）

Edan昨日出席活動時為事件開腔，表示希望「大事化小，息事寧人」，而姜濤亦為自己出言鬧床哥「冇品」道歉：「我已經道咗歉，佢接唔接受，我都尊重佢，佢道唔道歉都係佢嘅選擇。」去到昨晚（11月28日）JFYT就以「愛與和平音樂會」為題開直播，開始之前床哥表示接受姜濤道歉，指自己不想製造紛爭及社會矛盾：「其實好老實講本身我哋係諗住落區拉票，但係其實我自己個狀態唔係咁好。」

床哥接受姜濤道歉，更話自己不想製造紛爭。（圖：bedgor_littleworld@IG）

床哥續說：「呢件事我哋都係輸，唔好話諗住姜b道咗歉係咪佢輸，佢冇輸，我哋都係輸㗎！」又指因為今次事件收到大堆訊息，自己精神都受到影響：「咁佢今日喺訪問入面，喺傳媒朋友面前，佢有道咗歉。首先一樣嘢，我係接受佢嘅道歉㗎，我係唔想再製造紛爭，亦都唔想再去騷擾到我同我嘅屋企人，因為好老實講係幾唔舒服㗎。去到呢一刻搞到咁大，除咗花生友之外，我相信唔係大家想見到咁嘅。」床哥最後更起立向鏡頭90度鞠躬。

床哥最後向鏡頭90度鞠躬。（圖：網上圖片）

圖：keung_show@IG, bedgor_littleworld@IG, 網上圖片