文：珍寶豬

有日一位女士嚟到診所。

佢行埋嚟登記處：「阿醫生係打工呀定老細呀？」

我：「醫生係老闆」

佢：「咁架勢呀，好呀」

我：「你係咪要睇醫生？你俾身份證我登記先呀」

佢抬頭望望診所四周：「呢度佢買㗎？」

你嚟相睇定睇醫生呀？相睇嘅話目測直接出局啦喎你。

我：「我唔清楚」

佢：「唔清楚？你打佢工㗎喎」

打工嘅要唔要問埋老闆八字睇吓夾唔夾？

我：「我返工負責登記㗎咋」

佢：「你真係人生資歷淺，你打佢工都要CHECK清楚佢係咩人嚟呀，一陣佢唔係醫生，係殺人癲佬點算呀？」

睇嚟你過往人生過得好苦，成日俾人呃啦一定...陰公。

我：「你驚醫生唔係醫生？你可以上網CHECK吓註冊醫生名單，用名就搵到㗎啦」

佢：「我CHECK咗啦梗係」

我：「咁係咪可以登記啦？」

佢：「我要CHECK埋呢度係咪佢買呀」

咁你自己去查冊啦。

我：「呢度係買定租嘅應該同你有需要睇醫生冇關呀？」

佢：「識得喺香港置業嘅一定係有慧根有眼光嘅聰明人，租嘅都係白痴，個醫生係白痴嘅點醫人呀？說話係咪咁講呀」

你不如直接入去同醫生講同一番說。

佢繼續噴口水：「香港磚頭係全世界最保值一定賺嘅，做得醫生買幾百間都唔係問題啦，一間都唔買嘅一定係有問題嘅醫生！」

我突然腦海有畫面，佢如果他日要做手術嘅話，係咪喺手術枱上都問醫生『你有冇買樓』。冇嘅話係咪即刻彈起身唔做手術...

我：「咁你仲要唔要我幫你登記睇醫生呀...」

佢：「你都冇講呢度係買定租」

我：「一係你去第二間診所啦，你去搵過第二個醫生啦」

佢：「哈！真係俾我估中個醫生係白痴呀？幫人供樓呀？」

我：「你唔係要睇醫生嘅就麻煩你離開診所啦」

佢一路講一路用手掃自己身：「走！走得快啲添呀，唔好俾啲衰氣痴埋嚟我度呀」

駛唔駛咁誇張呀你？

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：Lifestylememory@freepik