【橙訊】樂隊ToNick的主音趙善恆（恆仔）昨日（2月19日）自爆與拍拖多年的前女友分手後抑鬱近一年，暗指對方背著他做出很多不能見光的事情，雖然沒有指名道姓，卻眾所周知他在說拍拖超過10年的譚杏藍（小花）。而小花亦不甘被暗串，晚上即在IG限時動態打長文反擊。

恆仔和小花曾是圈中公認甜蜜的情侶。（圖：hangjai@Instagram）

恆仔和小花拍拖超過10年，人前經常曬恩愛，又曾以情侶檔身分接拍廣告。去年2月二人在社交平台齊發白色圖片貼文，宣布與對方已經分手的消息，由於消息突然，當時令大家都相當驚訝。

二人於去年2月23日齊貼白圖，宣布和平分手。（圖：hangjai、hanatam@Instagram）

事隔大約半年，小花於去年9月宣布新戀情，與多年好友Ronald拍拖。（圖：hanatam@instagram）

二人宣布分手後差不多一年，恆仔昨日突然在IG貼出黑圖，打長文透露心聲，指去年經歷分手及爸爸血癌離世，2大打擊之下令他心感抑鬱，自爆曾有輕生念頭：「爭啲想走」。文中又提及「一齊好多好多年嘅女朋友」，疑背著他做出很多不能見光的事情，令他經常被「關心」：「原來你乜都唔知㗎？」因而情緒相當受影響。

恆仔心聲全文：

「有啲嘢好想講，因為我怕我真係會做傻事。我只會講一次 都唔會再回應。

話說，啱先有個「朋友」走埋來同我打招呼，咁我客氣咁寒暄咗幾句就算，但同呢位「朋友」對話之後我發現，我真係頂唔順喇。

其實我抑鬱咗一年，爭啲想走。感謝跑步真係救咗我好多。

上年，我爸爸走咗，亦同一齊好多好多年嘅女朋友分手。分咗手之後，當每一個人關心問我點

佢哋都會不經意咁講一句：『原來你乜都唔知㗎？』然後我就會聽到一個新嘅人名。

我身邊啲同事同埋朋友，之前佢哋唔講比我聽，係唔想影響我。我仲好似一個小朋友咁樣，鍾意創作，想做好每一件事，又好想做啲好嘢出嚟。

作為幕前，又唔想引起不必要嘅風波，費事影響到啲project同客戶，咁就不斷隱瞞自己情緒，扮正常，繼續發放正能量，然後我用咗一年時間處理我嘅心情。我冇死到，其實已經好好彩，但我唔想再扮喇。

我覺得夾band好開心，我覺得拍戲好開心，我而家都開始一段新嘅感情，而家係向建立一個好家庭方向出發。我淨係想好好地生活，做好我嘅工作，有一個好好嘅家庭，好好經營我嘅團隊，係咁多。

好少打咁多字，但因為我發現我真係面對唔到呢個情緒，唔想工作唔到，生活唔到，唔想開始唔到一段健康嘅新關係。所以，最重要係，唔該咁多位關事嘅「朋友」，唔好再走過來同我打招呼。

我唔會公開任何人名，只係想你哋知，我唔再係咩都唔知。而家我只想好好生活。」

恆仔情緒大爆發，疑暗示被小花「派帽」。（圖：hangjai@Instagram）

而小花晚上就在IG限時動態上，打長文反擊恆仔的隔空「指控」，表示感情出現問題是雙方都有責任，而她直言「問心無愧」似否認有做不見光的行為破壞關係。然後小花又直白地寫道：「今天是你演唱會開賣的大日子，祝一切順利。」疑暗串恆仔扮抑鬱博同情，意圖催谷演唱會門票的銷量。

小花在限時動態回應輿論。（圖：hanatam@Instagram）

圖：hangjai、hanatam@Instagram