住戶冒雨以膠盆傾倒積水落街。

【橙訊】颱風「小犬」發威，天文台昨日接連發出八號和九號風球，在黑雨夾擊下，將軍澳日出康城再次成為重災區。有網民在社交平台上載一段影片，疑似日出康城屋苑的高層單位在颱風襲港下露台水浸，住戶冒雨走出露台狼狽地人手去水，以膠盆盛水盛滿後多次直接向街外傾倒。

網民笑稱樓下住戶「間中有傾盆大雨」。

有網民搞笑地指單位樓下的住戶「間中有傾盆大雨」。有人則好奇查問「露台冇去水位咩？」、「但點解上下層都無事」，有人則估計「應該塞咗」、「應該係太多植物」。

於是有人點出重點「通渠咪得囉～」、「傻瓜，搵條水喉或者花灑，整虹吸好過啦」；另有人知機地表示，「各位業主真係要買定個電水泵，有咩事一定唔洗好似佢咁做」。還有人靈機一觸地問「算唔算高空擲物呢？」。更有網民將日出康城改成「溢出康城」。

上載短片的網民並無列明拍攝時間，但影片所見，拍攝時雨勢頗大。有眼利的網民指「舊片攞嚟笑」、「呢條片係咪舊？之前見過」、「好多年前啦，呢個又post出嚟」、「好像是舊料了」。不過，其他網民對片段相當受落，更大讚帖文「溢出康城」「個標題好正」。

圖：影片截圖