【橙訊】男團ERROR昨日（21日）宣布下月演唱會的售票詳情，不過就因演唱會主題名字以及海報被指涉及抄襲本地獨立樂隊，引來不少網民在留言區鬧爆！該樂隊亦在IG轉發演唱會海報，表示：「大佬你抄我哋功課都唔好抄成咁啦！」

ERROR宣布下月舉行3場演唱會。（圖：ERROR@IG）

ERROR宣布將於下月16日至18日在九展舉行3場演唱會，門票將於本月24日公開發售，演唱會則名為《明星生活ERROR Live Show 2022》。

不過就因「明星生活」四字引發爭議，原來本地獨立樂隊「米奇老味神奇屋」（The Low Mays）去年曾推出過同名歌曲，演唱會海報中193（郭嘉駿）擺出的動作更與The Low Mays歌曲海報中成員「漢和仔」十分相似，加上概念、海報設計風格及貼文內容，令不少人懷疑有抄襲之嫌。

ERROR被指抄襲The Low Mays。（圖：The Low Mays@IG）

不少網民湧入留言區表示：「我仲以為同thelowmays 合作，點知原來copycat（抄襲）。」、「係咪抄老味，好唔好意思？」、「真係唔明點解你要抄人哋個名同埋人哋主題囉？」、「咁難得開騷，點解要抄lowmay？」

引來不少網民在留言區鬧爆。（圖：ERROR@IG）

The Low Mays亦有留意到事件，在官方IG公開轉發ERROR演唱會海報，更標注了ERROR及公司MakerVille官方帳號，質疑：「大佬你抄我地（哋）工（功）課都唔好抄成咁啦！」、「真係無橋到要抄咩？」、「完全無問過我哋。」

The Low Mays公開質疑對方抄功課。（圖：The Low Mays@IG）

圖：ERROR@IG、The Low Mays@IG