文：珍寶豬

有日一位先生嚟到診所。

佢行埋嚟登記處：「姑娘。」

之後佢就停咗，等緊你講下句呀～你唔講我講啦？

我：「係咪要睇醫生？畀身份證我登記呀。」

佢：「唔係我睇呀！」

我確認過佢後面冇人：「咁佢嚟到先再登記呀，你可以坐低等佢嚟呀。」

佢：「唔係呀！」

佢又停咗，我懷疑自己最近壓力太大份人再冇咩耐性，腦海中突然有衝出去打佢一身嘅念頭……

我：「咁有咩幫到你呢？」

佢：「我老婆晚晚都扯到好勁，我可以點呀？」

幫佢撲火囉。

我：「你太太唔舒服嘅都要佢親自嚟睇醫生見醫生啊！」

佢：「我就快死嘅話可唔可以唔睇醫生？」

我又冇得拖你入房……你睇唔睇都係你嘅個人選擇。

我：「如果你哋唔舒服唔睇醫生，我哋都做唔到啲咩……」

佢：「你可唔可以打畀我老婆？」

我：「之後？」

佢：「叫佢減肥。」

傻的嗎？三九唔識七一打去就叫人減肥，都係Cold Call Cut線下場啫，冇幫助喎。不如你直接同老婆講減一磅畀一萬蚊佢？可能會有動力好多！

我：「唔好意思，我哋唔會咁樣打畀人同人講呢啲，如果你真係認為佢有需要睇醫生嘅，你最好叫佢嚟啦。」

佢拎出電話Show佢老婆張相畀我：「佢咁樣有需要啦！」

我都未出聲。

佢再講：「張床會震㗎，佢啲鼻鼾聲係犀利到咁呀！」

佢再播聲畀我聽，再問我：「你有咩感受？」

好有野性嘅感覺啊～

我：「佢應該係需要睇醫生嘅，佢咁樣都可能會好影響到佢自己睡眠質素，所以你都係叫佢嚟睇醫生啦。」

佢：「唔可以我講㗎，你打去講呀！」

我：「我打去同佢講你畀咗佢嘅相我睇，同錄低佢嘅鼻鼾聲畀我聽，咁我就所以打嚟勸佢睇醫生咁？」

佢退後兩步。

臨轉身離開診所前講咗句「你陰我！」

我冇陰你呀。

珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。

圖：Moose Photos@Pexels