【橙訊】猶記得2004年雅典奧運的直播放送事故，方力申對葉璇爆出一句「跟住你串我吖嘛！」，殊不知全程竟被直播出街。事後，坊間有傳小方不滿被葉璇搶白，因而與對方引起爭端，成為轟動一時的鬧劇。(重溫經典)雖然雙方曾多次解釋當時只是對稿，並無不和，唯始終無人相信。直至17年後，谷德昭才突然大爆當年內幕，究竟實情是怎樣的呢？

葉璇和方力申直播「互寸」成為經典熱話。

主打圓桌德州撲克遊戲的Youtube頻道《Round Table Poker》，日前請來方力申做嘉賓，期間主持人谷德昭偶然重提方力申和葉璇的互寸事件。據指身在電視廠的他與位於雅典奧運現場的二人，一直保持聯絡，他憶述︰「(當時)我哋就度緊點交波點接‥‥‥」小方驚愕問話︰「你都喺度咩？」，谷導淡定地解釋︰「係我度㗎嘛，我話跟住葉璇你就講咩，跟住你就寸佢一句，跟住小方就搭嗲咁樣，點知佢哋嘅對話就已經出晒街」。(點擊觀看影片; 09:07)

谷德昭得戚表示互寸對話是「我度的」。

事隔多年終於真相大白！不過方力申仍忍不住責怪︰「導演你而家先至講呀，搵咗幾耐都冇人信我呢廿年！」由於一早知道內情的谷導沒有及時為他平反，白白令他蒙冤受屈多年。談起當年的笑話，原來還有另一位關鍵人物，小方憶述︰「香港嗰邊唔知係叻哥定唔知邊個就話︰『得啦，一人少句‥‥‥』」這才加深了大家的誤會，認定二人鬧不和。

小方食死貓近廿年。

而對於有指當時小方因為鬧交而面露尷尬，他則坦言自己初入行未識「兜」︰「我唔係因為我講嗰句說話而尷尬， 驚寸嗰個字，而係因為我哋未ready而on air，所以才尷尬。」節目播出後，網民紛紛留言「谷導廿年後先為小方發聲，笑到」、「再睇多次小方講完嗰句手指指再黑面」、「奧運單野原來係咁真係笑咗」。

圖︰Youtube@者上傳，@Round Table Poker